पहिरोले बाटो अवरुद्ध हुँदा खाद्यान्नको अभाव

  ०७८ असोज १२ गते

चुमनुव्री गाउँपालिका–६ चुम्चेत स्थित लोक्पामा डेढ महिनादेखि निरन्तर पहिरोले बाटो अवरुद्ध हुँदा छेकम्पार र चुम्चेतमा खाद्यन्न अभाव भएको छ ।

वडा नम्बर ६ को चुम्चेत र वडा नम्बर ७ को छेकम्पारमा डेढ महिना यता उपभोग्य सामाग्री ढुवानी हुन नसक्दा समस्या उत्पन्न भएको हो ।

सडकले नजोडिएको उक्त क्षेत्रमा खच्चड मार्फत उपभोग्य सामाग्री ढुवानी हुँदै आएको र बाटो अवरुद्ध भएको कारण खाद्यान्न ढुवानी हुन नसकेको छेकम्पारका स्थानीय तेन्जीङ लामाले बताउनुभयो ।

‘मान्छे हिँड्ने बाटो छैन, लोक्पाको पहिरो कट्नै सकिन्न,’–उहाँले भन्नुभयो–‘गाउँका पसलहरु रित्तिसके, स्टक चामल पनि सकिदै गएको छ ।’

प्रदेश र सङ्घीय सरकारलाई बाटो अवरुद्धले पारेको खाद्यन्न सङ्कट लगायतका अप्ठारा सुनाएपनि अझै चामल पुग्न नसकेको स्थानीयको गुनासो छ ।

६ सय भन्दा बढी घरधुरी भएको यी दुई वडामा धानको खेती हुदैन । वडामा सहुलियत दरमा खाद्यान्न उपलब्ध गराउने खाद्यन्नको डिपो गाउँपालिकाको केन्द्र सिर्दिवासमा छ । वडालाई केन्द्रसँग जोडने बाटो भने पहिरोले अवरुद्ध छ ।

‘बाटोको बिचमा पहिरो छ, खाद्यको डिपोसम्म पुग्नै सकिन्न,’–लामाले भन्नुभयो– ‘भदौ १ गते लोक्पमा झरेको पहिरोले १२ ओटा खच्चड समेत पुरेको थियो । त्यसयता निरन्तर पहिरो गइरहेको छ ।’

गाउ“मा चामलको साथै चीनि र अन्य खाद्यान्न पनि सकिएको चुमनुव्री गाउँपालिका–७ छेकम्पारका वडा अध्यक्ष फासा फुञ्जो लामाले बताउनुभयो ।

नेपाली सेनाको हेलिकप्टर मार्फत चामल पुर्‍याउन पहल भइरहेको तर हालसम्म नआएको उहाँले बताउनुभयो ।

‘एक हप्ता अघि हेलिकप्टरबाट चामल आउँछ भनेर कुरेर बस्यौ, मौसम खराब भएर हेलिकप्टर आउन सकेन,’–उहाँले भन्नुभयो ।

गाउँका समस्या बारे जिल्ला प्रशासन कार्यालय, प्रदेश सरकार र सङ्घीय सरकारलाई समेत जानकारी गराएको उहाँको भनाइ छ ।

दुई वर्ष अघिसम्म छेकम्पार र चुम्चेतका स्थानीयले चीनको सिमा क्षेत्र पुगेर पनि उपभोग्य सामाग्री खरिद गर्ने गरेका थिए तर कोभिड–१९ को जोखिम बढेसँगै चीनको बजार पनि जान नपाएको लामाले बताउनुभयो ।

निरन्तरको पहिरो रोकिने सम्भावना नदेखिएकाले तत्काल चामल लगायतका सामाग्री हेलिकप्टरबाट व्यवस्थापन गर्न दुई वडाका बासिन्दाले माग राख्दै आएका छन् ।

छेकम्पार र चुम्चेतमा खाद्यान्न पुर्‍याउन हेलिकप्टरको व्यवस्थापन भइरहेको प्रमुख जिल्ला अधिकारी शङ्करहरी आचार्यले बताउनुभयो ।


हरिराम उप्रेती