समाचारहरू

पहिरोले मोलुङ गाउँपालिका-७ जेसे गौरीडाँडाका पाँच घरपरिवार विस्थापित भएका छन् । अविरल वर्षाका कारण गएको पहिरोले गौरीडाँडाका पाँच घरपरिवार विस्थापित हनुका साथै २३ घर परिवार जोखिममा परेका छन् ।

पहिरोका कारण गौरीडाँडाका स्थानीय टेकबहादुर पहरी, पेशलबहादुर पहरी, मानबहादुर पहरी, अम्बरबहादुर पहरी र तेजबहादुर सुनुवारको घरमा क्षति भइ पहिरोको उच्च जोखिम रहेकाले पीडित परिवारलाई सुरक्षित स्थानमा सारिएको वडाध्यक्ष हेमबहादुर सुनुवारले बताउनु भयो ।

पहिरोका कारण सोही स्थानका अन्य २३ घरपरिवार जोखिममा परेका छन् । जोखिमयुक्त घर परिवारलाई सरसामान, पशुचौपायसहित सुरक्षित ठाउँमा सार्ने प्रयास भइरहेको वडाध्यक्ष सुनुवारले जानकारी दिनुभयो ।

पहिरोका कारण सोही वडाको रतनेमा पनि घरहरू जोखिममा परेका छन् । पहिरोले स्थानीय ५५ वर्षीय पेम्बा तामाङ, ५० वर्षीय मीनबहादुर तामाङले पालेका पशुचौपाया पुरिएका छन् । गोठ माथिको कान्लो भत्किएर गोठ पुरिँदा पशुचौपाया पुरिएको जिल्ला प्रहरी कार्यालयका इन्स्पेक्टर विजय कार्कीले बताउनु भयो । रतनेका ६५ वर्षीय भक्तबहादुर तामाङ, ५६ वर्षीय सिंहबहादुर तामाङ, ४३ वर्षीया महीरानी तामाङ, पेम्वा तामाङ र मीनबहादुर तामाङको घर पहिरोको जोखिममा रहेकोले पीडित परिवार, पशुचौपाया र सरसामान सुरक्षित स्थानमा सारिएको प्रहरीले जनाएको छ ।

पहिरोले स्थानीय भुलभुले खोलाबाट पेल्टीसेटमार्फत निकालिएको विद्युत लाइनमा क्षति पुगेको छ । बालीनालीमा समेत गरेर लाखौँको क्षति भएको र क्षतिको विवरण सङ्कलनको काम पनि भइरहेको प्रहरीले जनाएको छ । पहिरो खस्ने क्रम बढेसँगै जेसे माध्यमिक विद्यालयको भवन जोखिममा परेको छ ।

यसवर्ष पहिरोले घर पुरिँदा एक जनाको मृत्यु भइसकेको छ । ०८१ असार १३ गते अविरल वर्षाको कारण घर र गोठमाथि पहिरो खस्दा चिशंखुगढी गाउँपालिका-५ थुम्कीका ३५ वर्षीया देवकुमारी खत्रीको मृत्यु भएको थियो ।

मौसम पूर्वानुमान महाशाखाको बुलेटिन अनुसार आगामी असार २० गतेसम्म जिल्लामा भारी वर्षाको सम्भावना छ । कोशी प्रदेशका उदयपुरबाहेक १३ ओटै जिल्लालाई मौसम पूर्वानुमान महाशाखाले उच्च जोखिमको क्षेत्रमा राखेको छ ।

सरस्वती बानिया