समाचारहरू

पहिरोबाट विस्थापित सिलिचोङ गाउँपालिका–१ बेसिन्दाका ५५ परिवारलाई जग्गा बाँडफाँड गरी हस्तान्तरण गरिएको छ ।

०७७ असार २७ गते राति गएको पहिरोबाट सिलिचोङ–१ बेसिन्दाका विस्थापित ९२ परिवारमध्ये ५५ परिवारलाई  खाँदवारी नगरपालिका–७ मा जग्गा बाँडफाँड गरी भदौ ९ गते हस्तान्तरण गरिएको छ ।

जिल्ला विपद् व्यवस्थापन समिति, खाँदबारी नगरपालिका र सिलिचोङ गाउँपालिकाले संयुक्त रूपमा विस्थापित ५५ परिवारहरूलाई गोलाप्रथा गरेर जग्गा बाँडफाँड गरिएको प्रमुख जिल्ला अधिकारी नुरहरी खतिवडाले बताउनु भयो ।

पहिरोबाट विस्थापित ९२ मध्ये ५५ परिवारले पुर्नस्थापनाका लागि खाँदबारी रोजेका छन् । खाँदवारी नगरपालिका उपप्रमुखको संयोजकत्वमा गठन भएको जग्गा व्यवस्थापन समितिले निशुल्क तथा सशुल्क जग्गा दिन चाहनेहरूबाट विवरण सङ्कलन गरी सबै भन्दा राम्रो मानिएको खाँदबारी नगरपालिका–७ भैरे डाँडाको जग्गा छनौट गरिएको छ ।

समितिले खाँदबारी नगरपालिका–७ स्थित भैरे डाँडामा ५५ परिवारको लागि ६९ रोपनी जग्गा १ करोड ३० लाखमा रुपियाँमा खरिद गरी ५५ परिवारलाई वितरण गरिएको छ ।

भुगर्वविदहरू तथा प्राविधिकहरूको प्रतिवेदनपछि जिल्ला विपद् व्यवस्थापन समितिले जग्गा खरिद गरी पहिरोबाट विस्थापित परिवारलाई हस्तान्तरण गरेको छ ।

जग्गाको लालपूर्जा संयुक्त नाममा भए पनि घर निर्माणको लागि कित्ता काट गरी प्रत्येक परिवारलाई वितरण गरिएको प्रमुख जिल्ला अधिकारी नुरहरि खतिवडाले बताउनु भयो ।

पहिरो गएकै स्थानमा दुई वर्षसम्म जोखिम मोलेर बस्दै आएका पहिरो पीडितहरू जग्गा पाएपछि खुशी भएका छन् ।

पहिरोले सिङ्गो गाउँ नै बगाएपछि बेसिन्दा र चेप्चेवासी विस्थापित भएका थिए । पहिरोमा परी ११ जना अझै बेपत्ता छन् ।

जग्गा बाँडफाँड सँगै पहिलो चरणमा अस्थाइ टहरा बनाउन ५० हजार रुपियाँ र घर बनाउन तीन किस्तामा ५ लाख रुपियाँ दिने व्यवस्था कार्यविधिमा रहेको प्रमुख जिल्ला अधिकारी खतिवडाको बताउनु भयो ।

पहिरो विस्थापित ९२ परिवारमध्ये २५ घरधुरीलाई सिलिचोङ गाउँपालिकाको चित्रे गाउँमा र चेप्चेवाका १२ घरलाई बखल्टुममा स्थानान्तरण गरिएको छ ।

चित्रेमा ५१ दशमलव ५ रोपनी ७० लाख रुपियाँ र बखल्टुममा १७ दशमलव ५ रोपनीे ३४ लाख रुपियाँमा खरिद गरी पहिरो विस्थापितको नाममा संयुक्त रजिस्ट्रेशन पास गरिएको छ । उक्त जग्गा चाँडै बाँडफाँड गरिने तयारी रहेको सिलिचोङ गाउँपालिका अध्यक्ष भुपालराज मेवाहाङले बताउनु भयो ।

जिल्ला विपद व्यवस्थापन समितिले गएको फागुन २९ गते जग्गा खरिद गर्ने निर्णय गरेपछि प्रक्रिया अगाडी बढेको थियो ।

सङ्घीय सरकार, प्रदेश सरकार र गाउँपालिकाले बजेट व्यवस्थापन गरी जग्गा खरिद गरिएको थियो ।

पहिरो विस्थापितहरूलाई मनसुनजन्य विपद प्रभावितहरूलाई पुनस्र्थापना गर्ने सम्बन्धी कार्यविधि अनुसार बजेटको व्यवस्थापन गरी जग्गा खरिद तथा घर निर्माण गर्न लागिएको हो ।

कार्यविधि अनुसार सङ्घीय सरकारले ६०, प्रदेशले ३० र स्थानीय सरकार सिलिचोङ गाउँपालिकाको १० प्रतिशत लगानी गरेको छ ।

घर निर्माणको लागि सिलिचोङ गाउँपालिकाले आफ्नो दायित्वमा परेको १० प्रतिशत रकम जिल्ला विपद व्यवस्थापन कोषको खातामा जम्मा गरिसकेको र सङ्घ तथा प्रदेश सरकारमा बजेट माग भइसकेको प्रमुख जिल्ला अधिकारी नुरहरि खतिवडाको भनाइ छ ।

भविन कार्की