पहिरोका कारण प्यूठानका ६५ विद्यालय जोखिममा

वर्षातको समयमा ०७३ साउन १० र ११ गते आएको अविरल वर्षाका कारण प्यूठानका ६५ ओटा विद्यालय जोखिममा रहेको जिल्ला शिक्षा कार्यालय प्यूठानले जनाएको छ ।

जिल्ला शिक्षा अधिकारी नारायणप्रसाद भट्टराईका अनुसार जिल्लाका ३ सय ८५ विद्यालयमध्ये नौ ओटा विद्यालय पूर्ण क्षति भएका छन् भने ५५ विद्यालय आशिंक क्षति भएका छन् । पहिरोका कारण विद्यालयका भवन चर्किनुका साथै भत्किएका छन् ।

खवाङ्, स्वालिवाङ, फोप्ली, रजवारा, अर्खा, पुजा, डामृ गाविसका १२ ओटा प्रावि, निमावि र माविमा पहिरोले क्षति पुर्‍याएको जिल्ला शिक्षा कार्यालय प्यूठानले जनाएको छ ।

पहिरोले खवाङ गाविस-९ काईयास्थित नेरा प्राविको नवनिर्मित भवन, खवाङ गाविसको भिमसेन प्रावि, रजवारा गाविसको नेरा प्रावि, पुजा गाविसको शिशु कल्याण प्रावि गैँडेचौर, शिशु कल्याण प्रावि डाँडापानी, स्याउलीवाङ गाविसको शिव मावि, सूर्य ज्योती प्रावि, शरिप्रकाश आधारभूत विद्यालयलगायतका विद्यालयको भौतिक संरचनामा पहिरोले क्षति पुर्‍याएको जिल्ला शिक्षा कार्यालय प्यूठानका विद्यालय निरिक्षक शिव पण्डितले बताए ।

विद्यालयमा पठनपाठन अवरुद्ध हुन नदिनको लागि विद्यालय क्षतिको विवरण सङ्कलन भइरहेको र विभिन्न निकायसँग छलफल भईरहेको जिल्ला शिक्षा अधिकारी नारायणप्रसाद भट्टराईले बताए । उनका अनुसार यतिवेला वर्षको विदाका कारण विद्यालय बन्द भएपनि भदौ ५ गतेदेखि सञ्चालन गरिने भएकाले त्यतिञ्जेलसम्म वैकल्पिक उपाय अपनाउन नसके पठनपाठनमा समस्या हुन सक्छ ।


रविन्द्र पाण्डे