समाचारहरू

चाँगुनारायण नगरपालिका क्षेत्रमा शिक्षा, स्वास्थ्य र खाद्य अधिकारका क्षेत्रमा देखिएका समस्या सम्बन्धमा मानव अधिकार निगरानी समूहले चाँगुनारायण नगरपालिकाका प्रमुख सोमप्रसाद मिश्रलाई ज्ञापन पत्र बुझाएको छ ।

अनौपचारिक क्षेत्र सेवा केन्द्र (इन्सेक) प्रदेश ३, कार्यालयद्वारा असार ३ गते आयोजित मानव अधिकार निगरानी समूह, जनप्रतिनिधि र सरोकारवालाहरूबीच भएको समन्वयात्मक कार्यक्रममा चाँगुनारायण नगर भित्र रहेका समस्याहरूको विषयमा निगरानी समूहले तयार पारेको प्रतिवेदनमा समस्याको पहिचान गरी समाधानका लागि पहल गर्न समूहका संयोजक बच्चुराम न्यौपानेले ज्ञापन पत्र बुझाएका हुन् ।

निगरानी समूहले नगरपालिका भित्र शिक्षा, स्वास्थ्य र खाद्य अधिकारका क्षेत्रका सरोकार राख्ने विद्यालय, स्वास्थ्य चौकी, कृषि र पशु सेवाको अवस्था र समस्या पहिचान गरी त्यसलाई सुधार गर्नको लागि नगर प्रमुख मिश्रको ध्यानाकर्षण गराएका हुन् ।

ज्ञापन पत्र बुझ्दै नगर प्रमुख मिश्रले नगरपालिकामा देखिएका समस्या समाधान गर्न आफू सक्रिय रूपमा लाग्ने बताए । उनले नगरभित्र रहेका समस्या आफूले सक्ने आफैँले गर्ने र नसक्ने मुद्दा माथिल्लो निकायलाई पठाउने बताए ।

यसैगरी उपप्रमुख बिना बास्तोलाले निगरानी समूहको सक्रियताले कर्मचारीमा पनि जनताको काम समयमै गर्न र आफूले उपलब्ध गराउने सेवा छिटो छरितो र चुस्त बनाउन दबाब बढ्ने बताउँदै निगरानी समूहको खबरदारीले नगरपालिकाको काममा सहयोग पुगेको बताइन् ।

इन्सेक प्रदेश ३, कार्यालय काठमाडौँका कार्यक्रम संयोजक गणेश भण्डारीले नागरिक र जनप्रतिनिधि तथा सरोकारवालाबीच निगरानी समूहले पुलको काम गर्ने गरेको बताए ।

उनले शिक्षा, स्वास्थ्य, कृषि र पशु सेवामा देखिएका कमीकमजोरीलाई सुधार गर्दै गुणस्तरीय शिक्षा, स्वास्थ्य, खाद्य उपभोग गर्न पाउने जनताको अधिकारलाई नगरपालिकाले पहिलो प्राथमिकतामा राख्नु पर्ने बताए ।

कार्यक्रममा नगर भित्र रहेका समस्याहरूलाई समाधानका लागि आफूहरूले निगरानी गर्दै आएको जानकारी निगरानी समूहकी उपसंयोजक अम्बिका खत्रीले बताइन् ।

उनले अपाङ्गता भएका बालबालिकालाई विद्यालयले भर्ना नै नलिएको हुँदा त्यसको जिम्मेवारी कसले लिने हो ? भन्दै संविधानले नै शिक्षाको सुनिश्चितता गरेको अवस्थामा विद्यालयले भर्ना नलिने हो भने स्थानीय सरकार गाउँमा आएको भन्नु भ्रमपूर्ण भएको गुनासो गरिन् ।

ज्ञापन पत्रमा स्वास्थ्य चौकीमा स्वास्थ्यकर्मी समयमा नआउने, कृषिमा बजेट नुछुट्याइएको, पशुसेवाको लागि कर्मचारी अभाव रहेको, विद्यालयमा समानुपातिक शिक्षकको अवस्था नरहेको, निजी र सरकारी विद्यालयको शिक्षाको गुणस्तर समान नरहेको लगायतका विषयमा ध्यानाकर्षण गराइएको थियो ।

कार्यक्रममा, शिक्षा शाखाका प्रमुख वीरसिंह खड्का, पशु सेवाका प्रमुख ऋषीराम लामिछाने, कृषिका प्रमुख श्रवणकुमार पासवान, स्वास्थ्यका प्रमुख कर्ण श्रेष्ठले आआफ्नो क्षेत्रमा देखिएका समस्यालाई समाधान गर्न लागि पर्ने प्रतिबद्धता जनाएका थिए ।

पञ्चकन्या माविका प्रधानध्यापक शन्तराम दुलाललगायतले पहिचान भएका समस्याको समाधान नगरपालिकाले खोज्नु पर्ने बताएका थिए ।

सविना केसी