समाचारहरू

फलेवास नगरपालिका–९ भङ्गराकी २१ वर्षीया सन्तोषी केसी जिल्ला स्वास्थ्य कार्यालय पर्वतमा सुत्केरी भइन् ।

उनले ३ केजी तौल भएको छोरालाई अस्पतालकै डाक्टर र नर्सहरूको सहयोगमा जन्म दिइन् । बच्चा जन्मिएपछि जन्म प्रमाणपत्र तत्कालै पाइन् तर राज्यले तोकेका सुविधा सुत्केरी भत्ता र यातयात भाडा भने उनले पाइनन् ।

सन्तोषी मात्रै होइन जिल्ला अस्पताल पर्वतमा गत मङ्सिरदेखि प्रसूति भएका महिलाहरूले भत्ता र यातयात भाडा स्वरूपको रकम पाएका छैनन् ।

नेपाल सरकारले राज्य मातहतका स्वास्थ्य संस्थामा सुत्केरी भएबापत भत्ता स्वरूप २ हजार रुपियाँ र नियमित चेकजाँच गराएकालाई थप ८ सय रुपियाँ गरी २ हजारदेखि २ हजार ८ सय रुपियाँसम्म सुत्केरी भत्ता र आवातजावत बापतको भाडा पाउने व्यवस्था गरेपनि पर्वत जिल्ला अस्पतालले पर्याप्त रकम नभएको भन्दै सुत्केरीलाई रित्तोहात फर्काउने गरेको छ ।

जिल्ला अस्पताल पर्वतले गत मङ्सिर महिनादेखि अस्पतालमा भएका सुत्केरीलाई भत्ता दिन नसकेको हो । अस्पताल प्रशासनले आमा सुरक्षा कार्यक्रमका लागि यसअघि भित्रिएको रकम वितरण भइसकेको र नयाँ रकम निकासा नभएको भन्दै सुत्केरी भत्ता दिन नसकेको जनाएको छ ।

कुश्मा नगरपालिका अन्तर्गत रहेको जिल्ला अस्पतालमा गत कात्तिक महिनासम्म नगरपालिकामार्फत रकम भित्रिएको र गण्डकी प्रदेश मातहतमा जिल्ला अस्पताल गाभिएपछि उक्त रकम विनियोजन नभएको हो ।

जिल्ला स्वास्थ्य कार्यालय पर्वतकी प्रमुख डाक्टर सन्तोषी थपलियाका अनुसार गण्डकी प्रदेश सरकारसँग माग गरिएको र अख्तियारी नआइसकेकोले सुत्केरी भत्ता प्रदान गर्न नसकिएको हो ।

‘प्रदेश अन्तर्गत सञ्चालनमा आउन सुरू भएपछि रकम निकासा नहुँदा अस्पताल र स्वास्थ्य कार्यालयका प्रशासनिक कार्य समेत प्रभावित बनेका छन् ।’–उनले भनिन् ।

जिल्ला अस्पताल पर्वतमा कार्यरत इन्डोर इञ्चार्ज सरस्वती बरालका अनुसार साउन महिनादेखि हालसम्म जिल्ला अस्पतालमा पर्वतमा मात्रै २ सय ७५ जना सुत्केरी भएका छन् ।

कात्तिकसम्म नगरपालिकाबाट प्राप्त रकम ४ लाख ५० हजार रुपियाँ सुत्केरी भत्ता र यातयात भाडाका रूपमा वितरण गरिसकिएको बताउँदै त्यसपछिका सुत्केरी महिलाहरूलाई रकम अभावमा नै भत्ता र यातयात भाडा प्रदान गर्न नसकिएको स्वीकार गरिन् ।

पर्वतमा एक जिल्ला अस्पताल सहित ५२ स्वास्थ्य चौकी र दुई प्राथमिक स्वास्थ्य केन्द्र छन् । जिल्ला अस्पतालमा यो समस्या आएपनि अन्यत्रका बर्थिङ सेण्टरहरूमा भने खासै समस्या नदेखिएको जिल्ला स्वास्थ्य कार्यालय पर्वतले जनाएको छ ।

सन्तोष थापा