पर्वतमा मानव अधिकार उल्लङ्घनका घटना कमीः सरोकारवाला

  ०७६ वैशाख १० गते

अनौपचारिक क्षेत्र सेवा केन्द्र (इन्सेक) गण्डकी प्रदेश कार्यालयले वैशाख १० गते पर्वतमा विभिन्न सरोकारवाला निकायका प्रमुख एवम् प्रतिनिधिसँग मानव अधिकारका सवालमा अन्तरक्रिया गरेको छ ।

अन्तरक्रियाका वक्ताहरूले वर्ष पुस्तकको बारेमा चर्चा गर्दै मानव अधिकार उल्लङ्घनका घटनामा कमी ल्याउन प्रभावकारी भएको बताएका थिए ।

कार्यक्रममा इन्सेक गण्डकी प्रदेश संयोजक शिव खकुरेल, नर्वेजियन एम्बेसीका राजनीतिक सल्लाहकार टोर्न लोभडालसहितको टोलीले पर्वतको मानव अधिकारको अवस्था र नेपाल मानव अधिकार वर्ष पुस्तकको प्रभावको बारेमा छलफल गरेको थियो ।

छलफलका क्रममा पर्वतका प्रमुख जिल्ला अधिकारी गुरुदत्त ढकालले मानव अधिकार उल्लङ्घनका घटना हुन नदिन आफू र मातहतका सबै सरकारी सेवादायक निकायहरूलाई सचेतिकरण गरिरहेको बताउँदै वर्ष पुस्तकमा गम्भीर प्रकृतिका सामाजिक हिंसालाई पनि उठान गर्नुपर्ने बताएका थिए ।

कार्यक्रममा जिल्ला प्रहरी कार्यालय पर्वतका प्रमुख श्यामु अर्यालले मानव अधिकारको संरक्षणमा प्रहरी सधैँभर लागिरहेको बताउँदै प्रहरी सुरक्षाकर्मीकै मानव अधिकार हनन् भएको अवस्थामा बोल्ने निकाय नभएको गुनासो गरेका थिए ।

गैरसरकारी संस्था महासङ्घका केन्द्रीय सचिवले मानव अधिकार वर्ष पुस्तकले मानव अधिकार उल्लङ्घनका घटना न्यूनीकरणमा सहज भएको बताए ।

उनले मानव अधिकार उल्लङ्घनका घटनालाई उजागर गर्न र सबै समक्ष समग्र जिल्लाको मानव अधिकार अवस्थाबारे छर्लङग पार्न पुस्तक प्रभावकारी रहेको बताए ।


सन्तोष थापा