समाचारहरू

पर्वतमा डेंगी सङ्क्रमितको सङ्ख्या दिनानुदिन बढ्दै गएको छ । सङ्क्रमितको सङ्ख्या बढ्दै गएपछि जिल्ला अस्पतालमा शैया अभाव भएको छ ।

पर्वत अस्पतालमा मात्रै परीक्षण गरिएका ८ सय ५३ जना मध्ये भदौ २८ गतेसम्म ६ सय ५६ जनामा सङ्क्रमण पुष्टि भएको स्वास्थ्य कार्यालय पर्वतका प्रमुख प्रविण शर्माले जानकारी दिनु भयो । अस्पताल बाहेक निजी क्लीनिकहरुमा पनि डेंगीको परीक्षण हुने र सङ्क्रमण देखिएका बिरामीह अस्पतालमा भर्नाका लागि जाने गरेपछि शैयाको समस्या भएको हो ।

पर्वत अस्पतालका प्रमुख मेडिकल सुपरिटेन्डेण्ट डा. हेमन्त बाँस्तोलाका अनुसार डेंगीबाट पर्वतमा एक महिलाको मृत्यु भइसकेको छ । पर्वत अस्पतालमा उपचार हुन नसकेपछि पोखरा लैजाँदै गर्दा ती महिलाको मृत्यु भएको हो ।

अस्पताल सङ्क्रमितले भरिभराउ छ । १५ शैयाको पर्वत अस्पतालमा सुविधा सम्पन्न भवन बनेपछि अस्पताल व्यवस्थापन समितिले ६० शैया सञ्चालनमा ल्याएको छ । शैया अभाव भएपछि कतिपय बिरामीलाई घरबाटै उपचारका लागि आउने जाने गरी व्यवस्थापन गरिएको डाक्टर बास्तोलाले बताउनु भयो ।

कुश्मा नगरपालिका-५ निवासी ५६ वर्षीय  प्रितम थापाले डेंगीका लागि उपचार गर्न अस्पतालमा गएको भएपनि शैया अभाव भएपछि घरबाटै समयसमयमा रगत परीक्षणका लागि आउने जाने गरेको बताउनु भयो ।

ग्रामीण क्षेत्रमा भन्दा बजारमा बिरामीको सङ्ख्या अधिक छ । कुश्मा नगरपालिकास्थित सदरमुकाम कुश्माबजारमा मात्र ५ सयभन्दा बढीमा सङ्क्रमित छन् । सङ्क्रमितमध्ये ४९ प्रतिशत पुरुष र ५१ प्रतिशत महिला रहेका जिल्ला स्वास्थ्य कार्यालयले जनाएको छ ।

सन्तोष थापा