समाचारहरू

निर्वाचन आयोगले संस्कृति, पर्यटन तथा नागरिक उड्डयनमन्त्री प्रेमबहादुर आलेलाई निर्वाचन आचारसंहिता उल्लङ्घन हुने गरी क्रियाकलाप गरेको विषयमा २४ घण्टे स्पष्टीकरण सोधेको छ ।

मन्त्री आलेविरुद्ध आयोगमा डोटीको जोरायल गाउँपालिकामा नेकपा (एकीकृत समाजवादी) र नेकपा (माओवादी केन्द्र) को संयुक्त आयोजनामा ०७९ वैशाख २६ मा भएको चुनावी सभामा पार्टीका लागि मत मागेको, मतदाता भड्काउन भ्रमात्मक भाषण दिएको, तडकभडक गर्दै भोजभत्तेर गरेको,  मतदातालाई रकम बाँडेको, गाउँपालिकामा नेकपा (एमाले) का अध्यक्षका उम्मेदवार दुर्गादत्त ओझाको चरित्र हत्या गर्ने खालका सम्पादित भिडियोहरू सार्वजनिक स्थलमा राखेको, गुण्डागर्दी गर्दै अराजक टिम परिचालन गरी ज्यान मार्ने धम्की दिएको आदि व्यहोरासहितको उजुरी  नेकपा एमालेले आयोगमा दिएको थियो   ।

आयोगले निर्वाचन आचारसंहिता, २०७८ को विभिन्न दफाविरुद्ध हुने गरी के कसो भएको हो र कारबाही किन गर्नु नपर्ने हो ? भन्ने प्रश्नसहित २४  घण्टाभित्र स्पष्टीकरण पेश  गर्न भनेको छ ।

त्यस्तै आयोगले नेकपा एमालेका उपमहासचिव नेकपा पृथ्वी सुब्बा गुरुङलाई पनि निर्वाचन आचारसंहिता उल्लङ्घन हुने गरी मौन अवधिमा क्रियाकलाप गरेको विषयमा २४ घण्टे स्पष्टीकरण सोधेको छ ।

एमाले उम्मेदवारलाई मत दिएर जिताउन भन्दै गुरुङको फेसबुक  एकाउन्टबाट वैशाख २८ गते बिहान ८:१० बजे भिडियो पोष्ट  भएको भन्दै सेतोपाटी अनलाईनमा समाचार प्रकाशन भएको  थियो ।

निर्वाचन आचारसंहिता, २०७८ को दफा १६ (घ) बमोजिम मौन अवधिमा राजनीतिक दलका पदाधिकारी वा उम्मेदवार तथा दलको भ्रातृ सङ्गठन वा सम्बन्धित व्यक्तिले सामाजिक सञ्जाल, अनलाइन, छापा वा अन्य कुनै माध्यमबाट राजनीतिक दल वा उम्मेदवारको पक्ष वा विपक्षमा कुनै सन्देश, सूचना वा प्रचार प्रसारका सामग्री पोष्ट शेयर गर्न वा गराउन नहुने व्यवस्था छ ।

आयोगले गुरुङलाई सोधिएको प्रश्नमा भनिएको छ, ‘यहाँले मौन अवधिमा एमालेका उम्मेदवारको पक्षमा सामाजिक सञ्जालमा  भिडियो पोष्ट गरेको कार्य निर्वाचन आचारसंहिताको उलङ्घन भएकाले किन कारबाही गर्नु नपर्ने हो ?’  २४ घण्टाभित्र पेश गर्नुहुन अनुरोध छ ।

यसैबीच, निर्वाचन आयोगले पर्साको वीरगञ्ज महानगरपालिकामा नेकपा (एमाले) का तर्फबाट मेयरका उम्मेदवार विजय सरागवीलाई निर्वाचन आचारसंहिता उल्लङ्घन हुने गरी क्रियाकलाप गरेको विषयमा २४  घन्टाभित्र स्पष्टीकरण पेश गर्न भनेको छ  ।

आयोगले जनता समाजवादी पार्टी नेपालका वीरगञ्ज महानगर कमिटीका अध्यक्ष ईश्वरचन्द्र यादवको उजुरीका आधारमा  सरावगीसंग  जवाफ माग गरेको हो ।

सरागवीले वैशाख २६ गते राति १२ः३० बजे महानगरको वडा नं. १६ स्थित एक मतदाताको घरमा प्रवेश गरी मत खरिद गर्न नगदको लेनदेन गरेकाले निजको उम्मेदवारी खारेज माग गर्दै यादवले आयोगमा उजुरी दिएका थिए  ।

आयोगले मतदातालाई प्रभावित हुने गरी कुनै पनि किसिमको आर्थिक प्रलोभन देखाउने गतिविधि गर्नुभएको हो ? तपाईंलाई के कति कारणले प्रहरी प्रसाशनले आफ्नो सुरक्षामा मतदाताको घरबाट बाहिर निकाल्नु परेको हो ? भनी सरावगलीलाई स्पष्टीकरण सोधेको  हो  ।

विमल पौडेल