परीक्षाको मुखमा विज्ञान शिक्षक नहुँदा विद्यार्थी पढाइबाट वञ्चित

  ०८१ माघ १२ गते

गुल्मीमा अङ्ग्रेजी, विज्ञान र गणित विषय अध्यापन गराउने शिक्षकहरू पाउँनै मुस्किल हुन थालेको छ । सदरमुकाम तम्घास र छिमेकमा समेत मुख्य बिषयमा शिक्षकको सङ्कट रहेको छ । जसको कारण परीक्षाको मुखमा विद्यार्थी पढाईबाट वञ्चित भएका छन् । रेसुङ्गा नगरपालिका–५ को जनसहयोग माविमा विज्ञान शिक्षक तीन महिना भए । कक्षा ९ र १० मा बिज्ञान र कक्षा ११ र १२ मा कम्प्युटर विषय अध्यापन गराइरहेका शिक्षक प्रकाश मरासिनीले माविमा नाम निकालेपछि दरबन्दी खाली रहेको छ । कात्तिक १३ गतेबाट दरबन्दी खाली भएपछि कक्षा ९ र १० का ६० बिद्यार्थीलाई समस्या भएको छ भने कक्षा ११ र १२ को ऐच्छिक कम्युटर बिषयनै कटौती गरेको प्रधानाध्यापक शिवराज फुल्लेलले बताउनु भयो ।

विद्यार्थीहरूको पढाइलाई धेरै प्रभावित हुन नदिन शिक्षक प्रकाश मरासिनीलाईनै अतिरिक्त कक्षा र छिमेकी विद्यालयबाट शिक्षकलाई आग्रह गरेर केही कक्षा सहजीकरण गरेको फुल्लेलले बताउनु भयो । उहाँले अहिले भर्खरै आयोगले जिल्लामा विज्ञान शिक्षक पठाएपनि कसैले बिद्यालय छनौट नगरेका कारण शैक्षिक सत्र अहिलेकै अवस्थामा सकिने बताउनु भयो । गाउँमा आर्थिक तथा सामाजिक अवस्था बेहाल रहेको छ । परीक्षाको मुखमा बिद्यार्थीहरुले पाठ्यपुस्तक नपाउने समस्यासँगै विषय शिक्षक नहुँदा पढ्न नपाउने अवस्था समस्या बन्दै गएको छ । एसइइको नजिक मुख्य विषयकै शिक्षक नहुँदा आफूहरूलाई निकै सास्ती भएको जनसहयोग माविका विद्यार्थी बिनोद नेपालीले गुनासो गर्नुभयो ।

केहि समय अघि रेसुङगा माध्यमिक विद्यालयले माध्यमिक तहको अङ्ग्रेजी राहत शिक्षकको लागि तीन पटक बिज्ञापन माग्यो । विद्यार्थीहरूको पढाई प्रभावित भइरहेको अवस्थामा दरबन्दीमा शिक्षक नभएपनि राहतमा समेत नपाएर तेस्रो पटकमा बल्लतल्ल शिक्षक पाएको विद्यालयका प्रधानाध्यापक भागीरथ भण्डारीले जानकारी दिनुभयो । जिल्लाका धेरै बिद्यालयमा दरबन्दी अनुसारका शिक्षक अभाव भएको शिक्षा विकास तथा समन्वय इकाइ गुल्मीका प्राविधिक सहायक रामप्रसाद पन्थीले जानकारी दिनुभयो । सरकारले दरबन्दी वितरण नगरेका धेरै समय भएको र स्थानीय तहले बिद्यालय मर्ज गरेर दरबन्दी मिलान गर्न नसकेको कारण समस्या सृजना भइरहेको पन्थीले बताउनु भयो । जिल्लामा पाँच सय ९० सामुदायिक र संस्थागत विद्यालयमा ५६ हजार दुई सय तीन विद्यार्थी सङ्ख्या रहेको शिक्षा विकास तथा समन्वय इकाई गुल्मीले जनाएको छ । जिल्लामा बालशिक्षादेखि कक्षा १२ सम्मका विद्यालयमा राहत र दरबन्दी गरी ३ हजार १ सय ५३ जनाको दरबन्दी रहेको कार्यालयले जनाएको छ ।

जिल्लामा पछिल्लो समय शिक्षकहरुले भटाभट राजीनामा गर्ने लहर चलेको छ । जिल्ला शिक्षा विकास तथा समन्वय इकाई गुल्मीका अनुसार गत साउनदेखि माघ १० गतेसम्म २३ जना शिक्षकले राजीनाम दिएर पेसा छोडेका छन् । सवैभन्दा धेरै प्राथामिक तहमा राजीनामा गर्नेहरु रहेका छन् । चन्द्रकोट गाउँपालिका–७ को शारदा माविको शिक्षिका बिना भण्डारीले शिक्षक सेवाबाट नाम निकालेको डेढ बर्षमै जागिर छोडेर बिदेश गएको समन्वय इकाईका प्राविधिक सहायक राम प्रसाद पन्थीले जानकारी दिनुभयो । उहाँले प्रावी तृतीयबाट ०७९ चैत २९ गते नियुक्ती लिएर ०८१ मङ्सिर १० गते राजीनामा गर्नुभएको हो ।

उदय माध्यमिक विद्यालय चन्द्रकोटका माध्यमिक तहमा अध्यापन गराउने भिमबहादुर थापा र जनबोध माध्यमिक विद्यालयमा गणित विषय अध्यापन गराउने गीता भण्डारीले राजीनामा दिनुभएको हो । थापाले बिरामी भएर र भण्डारीले तथ्याङ्क अधिकृतमा नाम निकालेर राजीनामा दिएको पन्थीले बताउनुभयो । पछिल्लो समयमा शिक्षण पेशामा त्यती रुचि नहुँनु र वेदैशिक रोजगारीको लहरले पनि राजीनामा दिनेहरुको सङख्यामा वृद्धि हुँदै गएको शिक्षा विकास तथा समन्वय इकाइ गुल्मीका प्रमुख थानेश्वर घिमिरेले बताउनु भयो । विषय शिक्षकको अभाव र राजीनामाको लहर जिल्लामा ठूलो समस्याको रुपमा रहेको घिमिरेले बताउनु भयो ।


टोपलाल अर्याल