समाचारहरू

सदरमुकामदेखि एक दिन टाढा रहेको मुगुम कार्मारोग गाउँपालिका-६ का एकै घरका तीन जना दिदीभाइले अपाङ्गता परिचय-पत्र नपाउँदा सरकारबाट अपाङ्गता भएका व्यक्तिलाई दिइने सेवाबाट विमुख भएको गुनासो गरेका छन् ।

मुगुम कार्मारोग गाउँपालिका-६ की ६८ वर्षीया छिरिङ पुटिक लामा, ४९ वर्षीया याङ्जम पुटिक लामा र ४१ वर्षीय दोर्जे लामालाई महिला तथा बालबालिका कार्यालयले अपाङ्गता परिचय-पत्र उपलब्ध नगराउँदा सरकारले स्थानीय निकायबाट दिने सबै खाले सेवा सुविधाबाट विमुख भएको पीडितहरू गुनासो गरेका हुन  ।

२५ वर्षअघि आमा र १६ वर्षअघि बुवाको मृत्यु भएपछि गाँउले आफन्तको साहारामा जीवन गुजारा गर्दै आएकी छिरिङ दृष्टिविहीन छिन् । उनकी बहिनी याङ्जम सुस्त मनस्थिति र भाइ दोर्जे पक्षघातका कारण अपाङ्गता भएका हुन् ।

तीनै जना परिचय पत्र बनाउन सदरमुकाम गमगढीसम्म आउन सक्ने अवस्था नहुँदा उनीहरूले परिचय-पत्र बनाउन सकेका छैनन् । परिचय पत्र नपाउँदा सरकारी सेवा सुविधाबाट वञ्चित हुनु परेको स्थानीय कार्मा लामाले बताए ।

याङ्जमले जङ्गलबाट दाउरा ल्याउने र खेतीपातीको सामान्य काम गर्न सक्छिन भने भाइ दोर्जेले मुस्किलले आफैँ खाना पकाउने गर्छन् । एक जनाले गरेको खेतीले तीन जनालाई वर्षभरी खान नपुग्ने स्थानीयले बताएका छन् । उनीहरूका लागि परिचय पत्र बनाउन गमगढी लैजान पनि समस्या भएको कार्माले बताए । दुई जनालाई बोकेर लैजानुपर्ने बाध्यताका कारण परिचय-पत्र बन्न सकेको छैन । गाँउमा अहिलेसम्म एकीकृत घुम्ति शिविर सञ्चालन भएको छैन । बोकेर लैजाने उपाय बाहेक अन्य केही नभएपछि आफूहरू पनि चुप लागेर बसेको कार्मले भने ।

सदरमुकाम पुगेर परिचय-पत्र बनाउन आर्थिक अवस्थाकै कारण लैजान नसकिएपनि गाउँ नजिक कतै शिविर सञ्चालन भएमा परिचय-पत्र पाउन सकिने आशा आफन्तहरूले गरेका छन् । उनीहरूको परिचय पत्र बनेको भए सरकारबाट मासिक १ हजार रुपियाँ पाउने थिए ।

यस विषयमा पहिलो पटक जानकारी भएको महिला तथा बालबालिका कार्यालयकी प्रमुख हसिना सुवेदी पराजुलीले बताइन् । उनले भनिन्-'स्थानीय चुनावको आचारसंहिता प्रभावित हुने हुँदा चुनावपछि शिविर सञ्चालन गर्छौँ ।'

अपाङ्गता भएका व्यक्तिका आफन्तले आवश्यक कागजपत्र र डाक्टरबाट प्रमाणित प्रमाण-पत्र ल्याउन सके जति बेला पनि परिचय पत्र दिने पराजुलीले बताइन् ।

जीवन सेजुवाल