समाचारहरू

यही २०७४ असार ३ र ४ गते परासी र जनकपुरमा प्रहरीको अत्यधिक बल प्रयोगबाट राष्ट्रिय जनता पार्टी (राजपा)का कार्यकर्ता र कपिलवस्तुमा बम बिष्फोटनबाट सर्वसाधारण नागरिकहरू समेत घाइते भएको घटनाप्रति जवाफदेही निगरानी समितिले निन्दा एवम् भत्सर्ना गरेको छ ।

‘यस्ता घट्ना बढ्दै गए मानवीय क्षति हुने बढी सम्भावना भएकाले प्रहरी प्रशासनका साथै राजपालाई समेत सचेत र सजक रहन आग्रह गर्दछौं । स्मरण रहोस यस समितिले मधेशमा विगतमा भएका दुखद् घट्ना नदोहोरिने सुनिश्चित गर्न प्रहरी माहानिरीक्षक समक्ष बैशाख २१ गते लिखित ध्यानाकर्षण गरेको थियो ।‘-समितिका संयोजक चरण प्रसाईँद्वारा जारी विज्ञप्तिमा उल्लेख गरिएको छ ।

‘लोकतन्त्रमा नागरिकले मतदानद्वारा आफ्नो प्रतिनिधि चुन्न र चुनिन पाउनु नैसर्गिक अधिकार हो । यस अधिकारको प्रयोग गर्न निषेध गर्नु मानवअधिकारका आधारभुत मुल्य-मान्यता विपरीत छ । आफ्नो अधिकार प्राप्त गर्न खोज्दा अरुका अधिकारमा आँच पुर्‍याउने कार्य गर्नु गैरलोकतान्त्रिक चरित्र हो ।‘-विज्ञप्तिमा उल्लेख छ ।

समितिले यस प्रकारका कृयाकलाप विश्व मानव अधिकारको घोषणापत्र, नेपाल पक्षराष्ट्र भएको नागरिक तथा राजनीतिक अधिकारसम्बन्धी माहासन्धि र नेपालको संविधानको समेत वर्खिलापमा भएको जनाएको छ ।

अनलाइन डेस्क