समाचारहरू

पत्रकार एवम् सुशासनका लागि भ्रष्टाचारविरुद्ध अभियानकर्मी सप्तकोशी नगरपालिका–११ भगनीका २६ वर्षीय कैलाश माझीलाई ‘मधेसी भाइरस किलर समूह’ले मार्ने धम्की दिएको भन्दै पीडितले फागुन २ गते शान्ति सुरक्षाको माग गर्दै जिल्ला प्रशासन कार्यालय सप्तरीमा उजुरी दिनु भएको छ ।

मार्ने धम्की दिएपछि शान्ति सुरक्षाको माग गर्दै जिल्ला प्रशासन कार्यालय सप्तरीका प्रमुख जिल्ला अधिकारी जर्नादन गौतमलाई भेटी उजुरी दिएको पीडित माझीले इन्सेक सप्तरी प्रतिनिधिलाई बताउनु भयो ।

माझीका अनुसार जिल्ला प्रशासन कार्यालयले आवश्यक कारवाहीका लागि जिल्ला प्रहरी कार्यालय सप्तरीमा र जिल्ला प्रहरी कार्यालयले शान्ति सुरक्षाका लागि इलाका प्रहरी कार्यालय कञ्चनरुपमा फागुन २ गते पत्राचार गरेको छ ।

सुशासनका लागि भ्रष्टाचारविरुद्ध अभियानमा सक्रिय माझी सूचनाको हकका लागि राष्ट्रिय महासङ्घका सदस्य र जागौँ नेपाल मधेस प्रदेशका सदस्य सचिवका साथै पिपुल्स न्युज र अन द स्पोट न्युजका सप्तरी सम्वाद्दाताका रूपमा कार्यरत हुनुहुन्छ ।

फागुन १ गते राति सुतेको बेला ढोका अगाडि छाडिएको मधेसी भाइरस किलर (कुनौली) का सहइन्चार्ज प्रकाश यादव (प्रभास) को हस्ताक्षरित पत्रमा माझीलाई हत्या गर्ने धम्की दिइएको छ ।

उक्त पत्रमा स्थानीय तहसँग सूचना माग गरेको, सूचना र पैसा नदिने स्थानीय तहको बदनाम गरेको कारण देखाउँदै माझीको घरमा आगो लगाइ दिने, घरमै आएर गोली हानी मार्ने र जहाँ भेट्यो त्यहीँ गोली हानी मार्ने लगायतको धम्की दिइएको छ ।

प्रकाश यादव (प्रभास) को हस्ताक्षरसहित पठाइएको पत्रमा सप्तकोशी नगरपालिका–१० कमलपुरमा रहेका उनको समूहको व्यक्तिले माझीको मोबाइल र आइडी ट्याक गरी निगरानी गरिरहेको, माझीको अपहरण गर्न घर वरिपरी चक्कर लगाए पनि सफल हुन नसकेको र पुनः पूर्ववत काम गरेमा घरमै आएर गोली हानी मार्ने धम्की दिइएको छ ।

उक्त पत्रलाई मिडियाबाजी गरे, प्रहरीमा खबर गरे वा कसैलाई भनेमा सो को परिणाम मृत्युबाट चुकाउनु पर्ने पत्रमा उल्लेख गरिएको छ ।

बाँच्न चाहने हो भने चुप लागेर बस्न तथा सफाइ दिन चाहेमा सम्पर्क गर्न भन्दै पत्रमा भारतीय नम्बर ००९१८९६३२०७५१० दिइएको छ ।

मनोहरकुमार पोखरेल