समाचारहरू

समाचार सङ्कलनका क्रममा पाँच जनालाई पत्रकारलाई दुर्व्यवहार गरेको आरोपमा प्रहरीले विराटनगर महानगरपालिका-७ स्थित बिग हस्पिटलमा रेडियोलोजी विभागमा कार्यरत कर्मचारी विराटनगर महानगरपालिका-९ का ३३ वर्षीय रोशन यादवलाई कात्तिक २३ गते  गिरफ्तार गरेको छ ।

नेपाल सरकारको अनुमति विना सञ्चालनमा रहेको विग अस्पतालमा ०८० कात्तिक २३ गते विराटनगर महानगरपालिकाले छापामारी अस्पतालमा शील गरेको विषयमा समाचार सङ्कलनका लागि पुगेका पत्रकार विराटनगर महानगरपालिका-६ का ३० वर्षीय हुसेन शेख, सुनवर्षी नगरपालिका-२ का २७ वर्षीय वीरेन्द्रकुमार साह, विराटनगर महानगरपालिका-२ का ४५ वर्षीय नवीन कर्ण, विराटनगर महानगरपालिका-८ का ३२ वर्षीय सोनुकुमार दास र विराटनगर महानगरपालिका-६ का ४० वर्षीय जितेन्द्रकुमार ठाकुरलाई दुर्व्यवहार गरेको आरोपमा प्रहरीले अस्पतालका कर्मचारी विराटनगर महानगरपालिका-९ का ३३ वर्षीय रोशन यादवलाई कात्तिक २३ गते गिरफ्तार गरेको हो ।

पत्रकारलाई धम्की दिएको र सञ्चार सामग्री खोसेर दुर्व्यवहार गरेको आरोपमा पीडित पत्रकारहरूले जिल्ला प्रहरी कार्यालयमा कात्तिक २३ गते उजुरी दिएपछि आरोपितलाई अनुसन्धानका लागि गिरफ्तार गरेको जिल्ला प्रहरी कार्यालयका डिएसपी रञ्जनकुमार दाहालले बताउनु भयो ।

घटनाको पत्रकारहरूले विरोध जनाएका छन् ।

मानव अधिकार रक्षकसम्बन्धी घोषणापत्र सन् १९९८ ले पत्रकारलाई मानव अधिकार रक्षकका रुपमा परिभाषित गरेको छ ।

 

विनोद सुवेदी