पत्रकार कुटपिट घटनाप्रति मानव अधिकारकर्मीहरूको ध्यानाकर्षण

 

नेपाल पत्रकार महासंघ पाल्पा शाखा  अध्यक्ष राजेश अर्याल र रेडियो मदनपोखरामा कार्यरत पत्रकार बिजय कुमार बौडेल माथी धम्की र कुटपिट गरिएको घटनाप्रति चैत १८ गते विज्ञप्ति प्रकाशन गर्दै मानव अधिकारकर्मीहरुले ध्यानाकर्षण जनाएका छन् ।

समाचार प्रकाशन/प्रशारण गरेकै आधारमा पत्रकारमाथि भएको उक्त घटना, अभिव्यक्ति तथा प्रेस स्वतन्त्रता माथिको आक्रमण भएकाले घटनामा सङ्लग्न व्यक्तिहरुको पहिचान गरी कानुन बमोजिमको कारवाहीका लागि अधिकारकर्मीहरुले सम्बन्धित पक्षको ध्यानाकर्षण गराएका छन्  ।

नेपालगञ्ज उच्च अदालत बार एशोसिएसनका अध्यक्ष विकास आचार्य, नेपाल मानव अधिकार संगठन, बाँके अध्यक्ष प्रह्लादबहादुर कार्की, इन्सेक नेपालगञ्जका संयोजक भोला महत,  फियान नेपालका संयोजक सुरेशकुमार गौतम, मानव अधिकार एलाइन्स बाँकेका अध्यक्ष प्रभात कुमार ठकुरी, उपभोक्ता हित संरक्षण मञ्च नेपाल केन्द्रिय सदस्य, वसन्त गौतम, हरप्लेस नेपालका कार्यकारी निर्देशक टोपबहादुर खड्का, हिमराईट्सका प्रकाश उपाध्याय आइएचआरसीका अध्यक्ष विश्वजीत तिवारीले हस्ताक्षर गरी विज्ञप्ति जारी गरेका हुन् ।

उनीहरुले चैत १७ गते बारा र पर्सामा आएको हावाहुरी र असिनाका कारण भएको मानवीय क्षतिको घटनाप्रति दुःख व्यक्त गरेका छन् ।


इन्सेक प्रदेश ५ कार्यालय, नेपालगञ्ज