पत्रकारलाई कुटपिट गरेको आरोपमा जनप्रतिनिधि विरूद्ध उजुरी

  ०७५ भदौ २७ गते

चितवनबाट प्रकाशन हुने जनअर्पण साप्ताहिकका सहसम्पादक अजय गोर्खालीलाई कुटपिट गरेको आरोपमा गैँडाकोट नगरपालिकाका आठ जना जनप्रतिनिधिविरूद्ध प्रहरीमा उजुरी परेको छ ।

कुटपिटमा संलग्न भएको आरोपमा गैँडाकोट नगरपालिका-३ का वडा अध्यक्ष शिवकान्त तिवारी, १८ का वडा अध्यक्ष तिलबहादुर चितौरे, ७ का वडा अध्यक्ष चोलानाथ उपाध्याय तथा नगर कार्यपालिका सदस्यहरू सुकबहादुर दराई, कान्छिमाया पुरी, कुमारी रेखा पौडेल, सङ्गीता घिमिरे पण्डित र मेनुका कँडेलविरूद्ध जिल्ला प्रहरी कार्यालय नवलपरासी (वर्दघाट सुस्ता पूर्व) मा उजुरी परेको जिल्ला प्रहरी कार्यालय नवलपरासी (वर्दघाट सुस्ता पूर्व)ले जनाएको छ ।

भदौ २२ गते समाचार सङ्कलनको क्रममा गैँडाकोट नगरपालिका पुगेका पत्रकार गोर्खालीलाई कुटपिट गरेको भन्दै नेपाल पत्रकार महासङ्घ, चितवन शाखाले भदौ २५ गते प्रहरीमा उजुरी दर्ता गराएको जिल्ला प्रहरी कार्यालय नवलपरासी (वर्दघाट सुस्ता पूर्व)का डिएसपी लिलाराज लामिछानेले बताए ।

उजुरीको विषयमा थप अनुसन्धान तथा छलफलका लागि इलाका प्रहरी कार्यालय गैँडाकोट पठाइएको जिल्ला प्रहरी कार्यालयले जनाएको छ ।


तिर्थराज डुम्रे