समाचारहरू

महागढीमाई नपा–१० गंजभवानीपुर निवासी गोरखापत्र दैनिक र रेडियो वीरगंजमा कार्यरत पत्रकार ४६ वर्षीय शिवशङ्कर मिश्रालाई कलैया उमनपा–५ का ५५ वर्षीय रतनलाल टेवानीले आक्रमण गरी दुर्व्यवहार गरेको आरोपमा पीडितले चैत ३ गते जिल्ला प्रहरी कार्यालय बारामा उजुरी दिएको छ ।

पत्रकार मिश्रालाई चैत २ गते बेलुका कलैया उमनपा–१ देवकीलाल धर्मशाला नजिकै समाचार लेखी रहेको बेला आरोपित टेवानीले चैत १ गतेको समाचारमा आफ्नो नाम समावेश नगरेको भन्दै दुर्व्यवहार गरेको आरोप छ ।

अभद्र व्यवहारमा पीडित आफैले उजुरी दिएकाले घटनाको अनुसन्धान भइरहेको जिल्ला प्रहरी कार्यालयका डिएसपी गौतम मिश्रले बताउनु भयो ।

आरोपित टेवानीको आक्रमणबाट पीडित पत्रकार मिश्रको देब्रे ओठ, नाक र बायाँ कुहीनोमा चोट लागेको छ । चैत २ गते नारायणी उपक्षेत्रीय अस्पताल वीरगंजमा उपचार गराई नियमित औषधी लिएको पीडित पत्रकार मिश्राले बताउनु भयो । समाचार लेखि रहेको समयमा आक्रमण गरी ल्याटप समेत फुटाएको उहाँले बताउनु भयो ।

पत्रकार मिश्रले कलैया पुस्तकालयको समाचार र फागुन २९ गते प्रकाशित समाचारका विषयमा विवाद गरि आक्रमण गरेको आरोप लगाउनु भयो ।

भोलानाथ पौडेल