समाचारहरू

नेपालगन्ज उपमनपा–१० भृकुटीनगरकी १९ वर्षीया स्वस्तिका लिम्बुको हत्या २० वर्षीय पति आशिष भनिने मुकेश बुढा क्षेत्रीले गरेको आरोपमा माइतीपक्षले वैशाख २ गते आरोपितविरूद्ध जिल्ला प्रहरी कार्यालयमा उजुरी दिएको छ ।

आरोपितले वैशाख १ गते नै हत्या गरेको भन्दै पीडित पक्षले उजुरी दिएको हो । आरोपितलाई कारवाहीको माग गर्दै वैशाख ३ गते नेपालगञ्जमा पीडित पक्षले प्रदर्शन समेत गरेका छन् ।

वैशाख १ गते मुकेशले स्वस्तिकाको हत्या गरेर आत्महत्या जस्तो देखाउन खोजेको माइतीपक्षले  आरोप लगाएको छ ।

प्रहरीमा दिएको उजुरीमा मुकेश लागुऔषध दुव्र्यसनी भएको र  विगतमा पनि पत्नीलाई  कुटपिट गर्ने गरेको उल्लेख छ । मृतकको शरीरभरी निलडाम भएको र नयाँ वर्ष मनाउन माइती घर आउन नदिएको मृतककी आमाले बताइन् ।

उनीहरूको प्रेम विवाह ०७५ कात्तिक ५ गते भएको थियो । घटनाको दिन मृतक पङ्खामा झुण्डिएको अवस्थामा भेट्टिएको आरोपित मुकेशले प्रतिक्रिया दिएका छन् ।

घटनास्थल पुग्दा शव खाटमा पाइएको प्रहरीले जनाएको छ । जिल्ला प्रहरी कार्यालयले हत्याको आरोपमा मुकेशलाई वैशाख २ गते गिरफ्तार गरी अनुसन्धान थालेको जनाएको छ ।

घटनापछि मृतकको मोबाइल लुकाइएको पीडित पक्षको आरोप छ । पङ्खामा झुण्डिएको भनिएको शव प्रहरी नपुग्दै झिकिएको र घटना मिलाउन राजनीतिक शक्तिको आडमा प्रहरीलाई दबाब दिइरहेको भन्दै निष्पक्ष अनुसन्धानको माग गरिएको छ ।

जिल्ला प्रहरी कार्यालयका एसपी अरुण पौडेलले घटनाको अनुसन्धान भइरहेको बताउँदै घटनाप्रति सम्वेदनशील भएको बताए । शव पोष्टमार्टमका लागि नेपालगन्ज मेडिकल कलेज शिक्षण अस्पतालमा राखिएको छ ।

स्मृति देवकोटा