पत्नी हत्या घटनाका आरोपित विरुद्ध उजुरी

  ०७३ मङ्सिर २१ गते

श्रीनगर गाविस-७ की ३० वर्षीया चाउरी लुवारको हत्या गरेको आरोपमा ३१ वर्षीय पति जगति लुवारलाई कानुनी कारबाहीको माग गर्दै मृतकका भाइ जसवीर लुवारले मङ्सिर २० गते जिल्ला प्रहरी कार्यालय हुम्लामा उजुरी दिएका छन् ।

पीडित महिलालाई डोरीले घाँटी कसेर मङ्सिर ९ गते हत्या गरेको आरोपमा पीडित पक्षले दिएको मौखिक उजुरीका आधारमा प्रहरीले आरोपितलाई अनुसन्धानका लागि मङ्सिर १५ गते गिरफ्तार गरेको थियो ।

जगती लुवारले हत्या गरेको अभियोगमा मङ्सिर २० गते उजुरी दर्ता गरेको जिल्ला प्रहरी कार्यालयका निमित्त कार्यालय प्रमुख इन्स्पेक्टर ओमप्रकाश यादवले बताए ।

मृतकको पोष्टमार्टम मङ्सिर १० गते बाजुरा जिल्लाको कोल्टी अस्पतालमा भएको प्रहरीले जनाएको छ ।

 


नन्द सिंह