समाचारहरू

देवदह नगरपालिका-६ की ३६ वर्षीया हुमा खत्रीलाई रड प्रहार गरी हत्या गरेको आरोपमा प्रहरीले उनका पति सशस्त्र प्रहरी बल नेपाल, बोडर्र आउट पोष्ट मतिअर्वा बारामा कार्यरत असई केहरसिंह खत्रीलाई पुस २६ गते आरोपितको घरैबाट गिरफ्तार गरेको छ ।

आरोपितले पीडित महिलालाई मङ्सिर २६ गते घरको छतमा लुगा सुकाउँदै गरेको अवस्थामा पछाडीबाट फलामको रडले हिर्काएर घाइते बनाएको र घाइते महिलाको क्रिमसन अस्पताल मणिग्राममा उपचारका क्रममा पुस २५ गते राति २९ औँ दिनका दिन मृत्यु भएको इलाका प्रहरी कार्यालय बुटवलका डिएसपी पवनकुमार भट्टराईले बताए ।

आरोपितविरूद्ध पुस २६ गते पीडितकी छोरीले ज्यान मार्ने उद्योगसम्बन्धी उजुरी दिएकी थिइन् । पीडितको मृत्यु भएपछि आरोपितविरूद्ध पुस २६ गते कर्तव्य ज्यानसम्बन्धी उजुरी दर्ता भएको प्रहरीले जनाएको छ ।

आरोपितको मानसिक सन्तुलन ठिक नभएको र थप उपचारका लागि लैजान भन्दै मङ्सिर २२ गते निजले कार्यरत रहेको सशस्त्र प्रहरी बल बाराले आरोपितको पत्नीलाई बोलाएर मङ्सिर २३ गते घरमा पठाएको थियो ।

घरको कोठामा आराम गरेर बसेका पतिले एक्कासी टाउकोमा हानेर बेहोस भएकी महिलालाई छिमेकीको सहयोगमा लुम्बिनी अञ्चल अस्पताल बुटवलमा पुर्‍याइएको थियो ।

अञ्चल अस्पतालमा उपचार हुन नसकेपछि थप उपचारका लागि क्रिमशन अस्पताल मणिग्रामको आइसीयु कक्षमा राखेर उपचार भइरहेको थियो ।

आरोपितलाई मानसिक रोगको औषधि खाने गरेको भने पनि उनी मानसिक रोग भएको पुष्टि हुने डाक्टरको रिपोर्ट नभएको प्रहरीले जनाएको छ ।

शवको पोष्टमार्टम पुस २६ गते नै लुम्बिनी अञ्चल अस्पताल बुटवलमा गरी परिवारलाई बुझाएको प्रहरीले जनाएको छ ।

रीमा बि.सी