पत्नी हत्या घटनाका आरोपित पतिविरुद्ध उजुरी

  ०८० कात्तिक ६ गते

वीरगंज महानगरपालिका–१४ बहुअरीकी ३५ वर्षीया महिमा खातुनको हत्या गरेको आरोपमा ४७ वर्षीय पति इजहारुल अन्सारीविरुद्ध पीडित पक्षले ०८० कात्तिक ५ गते जिल्ला प्रहरी कार्यालयमा उजुरी दिनु भएको छ ।

सोही घटनामा संलग्न रहेको आरोपमा इजहारुल अन्सारीकी ४० वर्षीया जेठी पत्नी नुजाहन खातुन, ६५ वर्षीय ससुरा हचकरिम अन्सारी र ६० वर्षीया सासुविरुद्ध समेत पीडित पक्षले उजुरी दिनु भएको छ ।

आरोपित पतिले ०८० कात्तिक ४ गते राति ९ बजे कान्छी पत्नी महिमा खातुनमाथि धारिलो हतियार प्रहार गरी गम्भिर घाइते बनाएको थियो । उनको वीरगंज हेल्थ केयरमा उपचारको क्रममा ०८० कात्तिक ५ गते बिहान १० बजे मृत्यु भएको जिल्ला प्रहरी कार्यालयका डिएसपी ध्रुव कुमार श्रेष्ठले जानकारी दिनु भएको छ ।

घटना बारे अनुसन्धान भइरहेकोले थप विवरण पछि पत्रकार सम्मेलन गरेर जानकारी गराइने डिएसपी श्रेष्ठले बताउनु भयो । मृतकको शव पोष्टमार्टमको लागि वीरगंजस्थित नारायणी अस्पतालमा राखिएको उहाँले बताउनु भयो ।

आरोपति पति फरार रहेको प्रहरीले जनाएको छ । घटनामा सलंगन इजहारुलको जेठी पत्नी नुर जहान खातुनलाई प्रहरीले नियन्त्रणमा लिएको छ ।

मृतक महिमा इजहारुलका कान्छि पत्नी हुन् । जेठी पत्नीबाट सन्तान नभएपछि इजहारुलले बाराको कलैया घुसुकपुरुवा की मृतक महिमासंग विवाह गरेका थिए । महिमाको एक ओटा तीन वर्षीया छोरी र एक ओटा एक वर्षीय छोरा रहेका छन् ।

वीरगंज कै राधेमाईस्थित व्युटीपार्लर संचालन गर्दै आएकी मृतक महिमा केही समय अगाडि पति इजहारुलविरुद्ध अदालतमा अंशको मुद्दा दिएकी थिइन् । मुद्दा हाल विचारधिन अवस्थामा रहेको उनका आफन्तले बताउनु भएको छ ।


शम्भुकुमार सुमन