समाचारहरू

इनरूवा नगरपालिका-३ की २३ वर्षीया निकिता चौधरीको हत्या गरेको आरोपमा प्रहरीले ३२ वर्षीय पति नागेन्द्र भगतलाई भदौ ३१ गते गिरफ्तार गरेको छ ।

दाइजो कम ल्याएको आरोपमा २३ वर्षीया दिदीको ०८० भदौ ३१ गते नागेन्द्र भगतले घाँटी थिचेर हत्या गरेको मृतकका २१ वर्षीय भाइ राकेश चौधरीले बताउनु भयो ।

आरोपित नागेन्द्रसँग दिदीको ०७८ मङ्सिर महिनामा मागी विवाह गरिदिएको र विवाहको बेला नगद ३५ लाख रुपियाँ, १० तोला सुन र ८० तोला चाँदी दाइजो दिएको मृतकका भाइ राकेशले बताउनु भयो ।

दाइजो कम भएको भन्दै आरोपितले हत्या गरेको आरोपमा पीडित पक्षले भदौ ३१ गते आरोपितविरूद्ध जिल्ला प्रहरी कार्यालयमा उजुरी दिएको एसपी विपिन रेग्मीले बताउनु भयो ।

पीडित पक्षको उजुरीका आधारमा शव हेर्दा शरीरभरी निलडाम देेखिएको र टाउकोमा रगत देखिएकाले घटना शङ्कास्पद भएको एसपी रेग्मीले बताउनु भयो ।

शव पोष्टमार्टमका लागि कोशी अस्पताल, विराटनगरको शव गृहमा राखिएको छ ।

शवको पोष्टमार्टम असोज १ गते गरिने तयारी गरिएको मृतकका भाई राकेश चौधरीले बताउनु भएको छ ।

जयकृष्ण यादव