समाचारहरू

भानु नगरपालिका–५ मैबल हटिया स्थायी घर भई हाल व्यास नगरपालिका–४ मा डेरा गरि बस्दै आएकी २२ वर्षीया रंगिला भुजेलको हत्या गरेको आरोपमा २१ वर्षीय पति मनोज बिष्टलाई  प्रहरीले जेठ ३० गते राती गिरफ्तार गरेको छ ।

विष्टले जेठ २६ गते राती पत्नी रंगिला भुजेलको धारिलो हतियार प्रयोग गरि हत्या गरेर बोरामा पोको पारेर फालेको जिल्ला प्रहरी कार्यालय तनहुँका एसपी अवदेश विष्टले जानकारी दिनु भयो ।

व्यास नपा–४ स्थित गुरुङ च्यानडाँडामा जेठ ३० गते विहान बोेरा भित्र पोको पारेर फालेको अवस्थामा रंगिलाको शव भेटिएको थियो ।

मृतकका बुवा मनबहादुर भुजेलले जेठ २८ गते छोरी हराएको भन्दै जिल्ला प्रहरी कार्यालयमा निवेदन दिनु भएको थियो । सोही निवेदनको आधारमा प्रहरीले शव माइती परिवारलाई देखाएपछि पहिचान भएको थियो ।

आरोपित विष्टलाई तनहुँ जिल्ला अदालतबाट पाँच दिनको म्याद थप गरि अनुसन्धान भइरहेको एसपी विष्टले बताउनु भयो ।

शवको जेठ ३० गते दमौली अस्पतालमा पोष्टमार्टम गरि जेठ ३१ गते माइती पक्षलाई जिम्मा लगाइएको एसपी विष्टले जानकारी दिनु भयो ।

प्रकाशचन्द्र भट्टराई