पत्नी हत्या घटनाका आरोपित गिरफ्तार

  ०७८ पुस १२ गते

फाल्गुनन्द गाउँपालिका‒२ इम्बुङकी ४५ वर्षीया जीवनकुमारी नेम्वाङको हत्या गरेको आरोपमा प्रहरीले ४८ वर्षीय पति इन्द्रकुमार नेम्वाङलाई पुस ११ गते गिरफ्तार गरेको छ ।

पीडितलाई आरोपितले घरायसी विवादका क्रममा पुस ९ गते लोहोरो प्रहार गरी घाइते बनाएको र पीडितको उपचारका क्रममा मृत्यु भएपछि आरोपितलाई अनुसन्धानका लागि गिरफ्तार गरेको जिल्ला प्रहरी कार्यालयका इन्स्पेक्टर डम्वर विश्वकर्माले इन्सेक प्रतिनिधिसँगको फोन सम्पर्कमा बताउनु भयो ।

टाउकामा चोट लागेकी पीडितको उपचारका क्रममा झापाको विर्तामोडस्थित वि एण्ड सी अस्पतालमा पुस ११ गते मृत्यु भएको इन्स्पेक्टर विश्वकर्माले बताउनु भयो ।

शवको पोष्टमार्टम वीपी कोइराला स्वास्थ्य विज्ञान प्रतिष्ठान धरान (घोपा) मा पुस १२ गते गरिने प्रहरीले जनाएको छ ।


सहमान विश्वकर्मा