पत्नी हत्या घटनाका आरोपित गिरफ्तार

  ०७८ वैशाख ४ गते

आठराई गाउँपालिका–४ तीनसल्लेकी २८ वर्षीया बिन्दा पुरीको ०७६ फागुन २९ गते हत्या गरेको आरोपमा प्रहरीले ४० वर्षीय पति काजीमान पुरीलाई वैशाख २ गते गिरफ्तार गरेको छ ।

पत्नी हत्याका लागि आरोपितले २४ वर्षीय भाई बालकृष्ण पुरी र ३१ वर्षीय सुरेन्द्र पुरीलाई प्रयोग गरेको अनुसन्धानका क्रममा खुलेपछि रोजगारीका लागि संयुक्त अरब इमिरेट्स(दुबई) मा रहेका आरोपित काजीमानलाई इन्टरपोल प्रहरीमार्फत रेड–नोटिस जारी गरी प्रहरी प्रधान कार्यालयसँग समन्वय गरेर गिरफ्तार गरेको जिल्ला प्रहरी कार्यालयका डिएसपी गौतम थापाले इन्सेक प्रतिनिधिसँगको भेटमा बताउनु भयो ।

पीडितको ०७६ फागुन २९ गते आठराई गाउँपालिका–४ स्थित भान्सा घरमा देवरहरूले खुकुरी प्रहार गरी हत्या गरेपछि प्रहरीले घटनामा संलग्न दाजुभाईलाई गिरफ्तार गरी कारबाही अघि बढाएको थियो ।

गिरफ्तारीमा परेका काजीमानविरूद्ध कर्तव्य ज्यान शीर्षकमा मुद्दा दर्ता गरी कारबाही अघि बढाउने डिएसपी गौतमले बताउनु भयो ।

शवको पोष्टमार्टम ०७६ फागुन ३० गते वीपी कोइराला स्वास्थ्य विज्ञान प्रतिष्ठान धरान(घोपा) मा गरिएको थियो ।


भगिश्वर लिम्बू