समाचारहरू

भक्तपुर नगरपालिका–६ सूर्य विनायककी २९ वर्षीया निरु कासिछ्वा (नागा) को हत्या गरेको आरोपमा महानगरीय प्रहरी परिसर भक्तपुरले पति ३४ वर्षीय रोशन नागालाई कात्तिक १४ गते गिरफ्तार गरेको छ ।

निरुलाई रोशनले कुटपिट गरेको कारण मृत्यु भएको भन्दै कात्तिक १४ गते माइती पक्षले उजुरी दिएपछि नागालाई गिरफ्तार गरी अनुसन्धान सुरु गरेको महानगरीय प्रहरी परिसर भक्तपुरकी एसपी तारादेवी थापाले बताउनुभयो ।

१२ वर्ष अघि प्रेम विवाह गरेकी निरुलाई रोशनले पटक/पटक कुटपिट गर्ने गरेको र पछिल्लो समय कात्तिक ३ गते कुटपिटबाट घाइते भएपछि उपचारको लागि इवामुरा मेमोरियल अस्पताल सल्लाघारी लगिएकोमा उपचारकै क्रममा निरुको कात्तिक १२ गते मृत्यु भएको पीडितका दाजु विकास कासिछवाले बताउनु भयो ।

उहाँले  यस अघि पनि असोज १८ गते बिहानै बहिनी रुदै माइती आएर लोग्नेले पटक/पटक कुटपिट गरेको र रातभरी पनि कुटेर सहनै नसक्ने भइयो, पुलिसलाई रिपोर्ट दिनु पर्यो भनेपछि महानगरीय प्रहरी परिसर भक्तपुरमा सोही दिन उजुरी दिएको जानकारी दिनु भयो ।

एसपी थापाले सोही दिन रोशनलाई बोलाएर छलफल गर्दा अब पतिपत्नी मिलेर बस्ने सहमतिपछि भएपछि पाँच दिनको तारिखमा घर पठाएको तर नागा तारिख लिन नआएको बरु एकै पटक निरुको हत्या भएको उजुरी आएपछि गरिफ्तार गरी अनुसन्धान सुरु गरेको जानकारी दिनुभयो ।

शवको कात्तिक १३ गते काठमाडौं मेडिकल कलेज दुवाकोट भक्तपुरमा पोष्ट मार्टम गरिएको थियो । मृतकको दाहासंस्कार कात्तिक १४ गते भयो ।

रमेश गिरी