समाचारहरू

चौरजहारी नगरपालिका-१४ नुवाकोटकी ४१ वर्षीया ललिता रानालाई धारिलो हतियार प्रहार गरी हत्या गरेको आरोपमा प्रहरीले उनका ४५ वर्षीय पति डिल्लीबहादुर रानालाई असार २० गते गिरफ्तार गरेको छ ।

पीडित ललिततालाई घरमा सुतिरहेको अवस्थामा असार १९ गते धारिलो हतियार प्रहार गरी हत्या गरेको मृतकका माइती पक्षले आरोप लगाएको छ । घटना सम्बन्धमा मृतकका माइती पक्षले असार २१ गते जिल्ला प्रहरी कार्यालयमा उजुरी दिएको छ ।

जिल्ला प्रहरी कार्यालय रुकुमका डिएसपी अङ्गुर जिसीका अनुसार रानाले घरमा पत्नी हुँदाहुँदै एक वर्षअघि ललितासँग दोस्रो विवाह गरेका थिए ।

हत्याको कारण नखुलेको भएपनि घरायसी विवादका कारण हत्या भएको हुन सक्ने जिल्ला प्रहरी कार्यालय रुकुमले जनाएको छ । घटनाको थप अनुसन्धान भइरहेको डिएसपी जिसीले बताए । मृतकको शवको पोष्टमार्टम असार २० गते गरिएको थियो ।

आदर्श केसी