समाचारहरू

लैङ्गिक हिंसा विरूद्धको १६ दिने अभियान चलिरहेका बेला मङ्सिर १२ गते कुटपिट गरी घाइते बनाएको आरोपमा छापहिले गाविस-१ का २० वर्षीया सरा ज्ञवालीलाई कुटपिट गरेको आरोपमा प्रहरीले २२ वर्षीय पति कुमार गिरीलाई सोही दिन गिरफ्तार गरेको छ ।

पीडित महिलालाई उनका पतिले टाउकोमा ढुङ्गा प्रहार गरी घाइते बनाएको आरोपमा पीडित पक्षले इस्मा प्रहरी चौकीमा उजुरी दिएको थियो ।

टाउकोमा गम्भीर चोट लागेकी पीडित महिलाको इलाका स्वास्थ्यचौकी इस्मा रजस्थलमा उपचार भइरहेको छ । टाउकोमा ढुङ्गाको टुक्रा अड्किएकाले बढी रगत बगेको र अहिले ती टुक्रा निकालेर उपचार भइरहेको स्वास्थ्यचौकीका प्रमुख चन्द्रप्रसाद भुसालले बताए ।

घरमा पनि पतिले कुटपिट गरेपछि चार महिनादेखि माइती बस्दै आएको पीडितले बताइन् । माइतीघर इस्मा रजस्थल-४ मा बस्दै आएकी पीडितलाई लिन गएका आरोपितले आउन नमानेपछि सामान्य कुटपिट गरेको बताए ।

पीडितका आफन्तले इस्मा प्रहरी चौकीमा दिएको उजुरीको आधारमा आरोपितलाई प्रहरीले तत्काल गिरफ्तार गरी अनुससन्धान गरिरहेको र थप कारबाही प्रक्रिया अघि बढाइने जिल्ला प्रहरी कार्यालयका असई चित्रबहादुर घर्तिले बताए ।

टोपलाल अर्याल