समाचारहरू

तिलाठी कोइलाडी गाउँपालिका–८ तोपाकी ३० वर्षीया मञ्जुदेवी खंगलाई ३५ वर्षीय पति राजकुमार खंगले मङ्सिर २७ गते रातभर निर्घात कुटपिट गरेको पीडित पक्षको आरोप छ ।

कुटपिटबाट बेहोस मञ्जुको आँखा, अनुहार र शरीरभरी चोटपटक लागेको छ । चोटले रक्ताम्य हुनभएकी उहाँको शरीर सुन्निएको छ । उहाँको योनीबाट निरन्तर रक्तश्रावसमेत भइरहेको अस्पतालले जनाएको छ ।

राजविराजस्थित गजेन्द्रनारायण सिंह अस्पतालमा मङ्सिर २८ गते उपचारार्थ भर्ना हुनुभएकी पीडितको अवस्था गम्भीर भएपछि चिकित्सकहरूले उहाँलाई सुविधासम्पन्न अस्पतालमा रेफर गरेका छन् ।

घरमा ११ र सात वर्षीय दुई छोरा र पक्षघात बिरामी साूु मात्र रहेको तथा आर्थिक अवस्था कमजोर भएकाले अन्यत्र उपचार गराउन जान उहाँले असमर्थता जनाउनु भएको छ ।

मादक पदार्थ र गाँजा सेवन गरी मङ्सिर २७ गते राति घर आएका आरोपितले नाबालक छोराहरूलाई समेत कुटपिट गरेको पीडित पक्षको आरोप छ ।

‘बिस्कुट र माछा खोइ ?’–भनेर सोध्ने बित्तिकै बालकहरूलाई कुटपिट गरेकाले जोगाउन अघि सर्नुभएकी पीडितले ‘कमाएर आफू मात्रै बाहिर खाएर आउने, छोराहरूले खानेकुरा माग्दा कुटने’ भनेर प्रतिवाद गर्नु भएपछि आरोपितले उहाँलाई नै लाठी, मुक्काले निर्घात कुटपिट गरेको पीडितले बताउनु भयो ।

अस्पतालको प्रहरी बीटले महिलाको अवस्थाबारे जानकारी दिएपछि आरोपितको तीव्रताका साथ खोजी भइरहेको भन्दै इलाका प्रहरी कार्यालय हनुमाननगरका इन्स्पेक्टर कमलकुमार लुङ्गेलीले घर छाडेर फरार भएकाले आरोपित गिरफ्तार गर्न नसकिएको बताउनु भयो ।

मनोहरकुमार पोखरेल