समाचारहरू

जन्तेढुङ्गा गाउँपालिका-३ की ३५ वर्षीया निर्मला राईलाई धारिलो हतियार प्रहार गरी घाइते बनाएको आरोपमा प्रहरीले ३६ वर्षीय पति केदार राईलाई असार २८ गते गिरफ्तार गरेको छ ।

असार २८ गते माइती घर खोटेहाङ गाउँपालिका-१ लिकुवापोखरीमा बसिरहेको अवस्थामा ३६ वर्षीय पति केदार राईले खुर्पा, कर्द र कँचियालगायतका धारिलो हतियार प्रहार गरी गम्भीर घाइते बनाएका छन् ।

पतिको आक्रमणबाट निर्मलाको टाउको पछाडि तीन ठाउँमा गहिरो चोट लागेको, बायाँ हातको बुढी औंलाबाहेक चार ओटा औंला काटिएको र दायाँ हातको दुई औंला चुँडिएको देखिएको जिल्ला प्रहरी कार्यालय खोटाङका डिएसपी नविनकिशोर प्रधानले बताए ।

गम्भीर घाइते भएकी निर्मलाको उपचार प्राथमिक स्वास्थ्य केन्द्र चिसापानीमा भइरहेको छ । उनको अवस्था नाजुक रहेको खोटेहाङ गाउँपालिका-१ लिकुवापोखरीका वडाध्यक्ष खड्गबहादुर खत्रीले बताए ।

प्राथमिक स्वास्थ्य केन्द्रमा उपचार नभएपछि उनलाई अन्यत्र लैजाने तयारी भइरहेको छ । घटनास्थलमा रगत पोतिएको कँचिया, कर्द र खुर्पा भेटिएकाले केदारले निर्मलालाई घरायसी हतियारले आक्रमण गरेको स्थानीयको भनाइ छ ।

निर्मला असार १३ गते माइती घर गएकी थिइन् । निर्मलालाई लिनका लागि ससुराली पुगेका केदारले आक्रमण गरेको स्थानीयको भनाइ छ । माइती गाउँमा आफन्तकोमा तरकारी पकाउन सघाउँदै गरेको अवस्थामा निर्मलामाथि पतिले आक्रमण गरेका थिए ।

सुनिता मगर