पत्नीलाई गोली प्रहार गरी हत्या गरेको घटनाका आरोपित गिरफ्तार

 

डुडुवा गाँउपालिका-३ बनकट्टीकी ३० वर्षीया शान्तीदेवी बर्मालाई गोली प्रहार गरी हत्या गरेको आरोपमा प्रहरीले ३० वर्षीय पति सञ्जयकुमार बर्मालाई चैत १५ गते गिरफ्तार गरेको छ ।

पीडित चैत १५ गते घरैमा सुतेको अवस्थामा अनुमति-पत्र प्राप्त बारबोरले कोखामा दुई राउण्ड गोली प्रहार गरेको प्रहरी चौकी बनकट्टीका असई तिलकबहादुर शाहीले बताए ।

मृतकको शव पोष्टमार्टमका लागि भेरी अञ्चल अस्पताल नेपालगञ्जमा राखिएको छ । स्थानीय राजेन्द्र विश्कर्माका अनुसार सञ्जयले यसअघि पनि पत्नीलाई बेला बेलामा कुटपिट गर्ने गरेको र घटना भएको दिन बिहान आफ्नै आमालाई समेत हतियार देखाएर लखेटेका थिए । उनीहरूको ११ वर्षीया एक छोरी रहेकी छन् ।


विनोद पाण्डे