समाचारहरू

गुल्मी जिल्लाको पराल्मी गाविस घर भई सन्धिखर्क नपा-२ मा अस्थायी बसोवास गर्दै आएकी १८ वर्षीया इन्दिरा विकलाई हात भाँचिने गरि कुटपिट गरेको आरोपमा १९ वर्षीय पति रामु विकलाई प्रहरीले मङ्सिर २३ गते गिरफ्तार गरेको छ ।

पीडित महिलालाई आरोपितले मङ्सिर २१ गते साँझ कुटपिट गर्दा बाँया हात भाँचिएको पीडितले बताएकी छन् । उनले भनिन्-'भाइको फोन आएको थियो । को केटासँग बोलेको भन्दै कुटपिट गर्नुभयो । शरीरभरि निल डाम छन् ।'

'पटक पटक ज्वाँइले कुटपित गरेको भन्दै छोरी माइतीमा आउँथिन् । धेरै पटक पति र पत्नीको कुरा हो भनि मेलमिलाप गरियो । अब त अति भयो भनेर कानुनी प्रक्रियामा गएका हौँ ।'-पीडित महिलाका बावु रूद्रबहादुर पाण्डेले भने ।

पीडित महिलाको उजुरीका आधारमा आरोपितलाई गिरफ्तार गरी घरेलु हिंसा अन्तर्गत मुद्दा दर्ता गर्ने तयारी गरिएको जिल्ला प्रहरी कार्यालयका इन्स्पेक्टर सुजनराज भण्डारीले जानकारी दिए । पीडित महिलाको उपचार अर्घाखाँची जिल्ला अस्पतालमा भएको प्रहरीले जनाएको छ ।

नारायण भुसाल