समाचारहरू

लहान नगरपालिका-६ की ४३ वर्षीया बबिता साहलाई हत्या गरेको आरोपमा ४५ वर्षीय पति विशेश्वरप्रसाद साहलाई इलाका प्रहरी कार्यालय लहानले भदौ २ गते राति गिरफ्तार गरेको छ ।

आरोपितले भदौ २ गते राति १० बजे तिर घरायसी विवादमा बबिता साहलाई सिलौटाले हिर्काउँदा गम्भीर घाइते भएकी थिइन् । झगडा छुटाउने क्रममा ६ वर्षीया छोरी सुजाता साह पनि गम्भीर घाइते भएकी थिइन् ।

घाइतेहरूको लहान स्थित रामकुमार सारदा उमाप्रसाद मुरारका अस्पतालमा उपचार भएकोमा उपचारकै क्रममा बबिताको भदौ २ गते राति ११ बजे तिर मृत्यू भएको थियो भने सुजाताको उपचार धरान स्थित विपि प्रतिष्ठानमा भइरहेको छ ।

मृतकका दाजु सुनिल साहले घटनाको विषयमा इलाका प्रहरी कार्यालय लहानमा भदौ ३ गते उजुरी दिएका छन् । लाशको पोष्टमार्टम लहान स्थित रामकुमार सारदा उमाप्रसाद मुरारका अस्पतालमा भदौ ३ गते भएको छ ।

इलाका प्रहरी कार्यालय लहानका डिएसपी राजकुमार केसीका अनुसार घटनाको जानकारी हुनासाथ आरोपितलाई गिरफ्तार गरी आवश्यक कारबाही प्रकृया अगाडि बढाएको बताए ।

दुर्गा परियार