समाचारहरू

बेलवारी नगरपालिका-१ भेडाटोलकी ४५ वर्षीया गीता लिम्बूको हत्या गरी ६० वर्षीय पति बमबहादुर लिम्बूले आत्महत्या गरेको प्रहरीले जनाएको छ ।

बेलवारी नगरपालिका-१ भेडाटोलमा डेरा गरी बस्दै आएका बमबहादुरले घरायसी विवादका क्रममा पत्नीलाई ०८० चैत ७ गते बिहान दाऊले प्रहार गरी हत्या गरेको र आफूले सोही हतियारले घाँटी रेटेर आत्महत्या गरेको घटनाको प्रकृतिले देखाएको जिल्ला प्रहरी कार्यालयका डिएसपी रञ्जनकुमार दाहालले बताउनु भयो ।

पत्नीको हत्यापछि बमबहादुरले छोराको पनि हत्या गर्न खोजेको तर छोरा भागेर बाँचेको डिएसपी दाहालले बताउनु भयो ।

आफ्नै घाँटी रेटेर घाइते भएका बमबहादुरलाई उपचारका लागि नोबेल मेडिकल कलेज पुर्‍याए लगत्तै चिकित्सकले मृत घोषणा गरेको प्रहरीले जनाएको छ ।

बेलवारी नगरपालिका-१ भेडाटोलमा निर्मला राईको घरमा विगत चार वर्षयता डेरा गरी बस्दै आएका लिम्बू दम्पतीमा दिनहुँ कलह हुने गरेको स्थानीयले बताएका छन् ।

घटनाका विषयमा स्थानीयले प्रहरीलाई खबर दिएका थिए । घटनाको स्थलको मुचुल्का तयारीपछि शव कोशी अस्पतालमा चैत ७ गते पोष्टमार्टम गरिने प्रहरीले जनाएको छ ।

विनोद सुवेदी