समाचारहरू

निजगढ नगरपालिका-९ भमरा टोलकी ३८ वर्षीया लक्ष्मी राईलाई ४२ वर्षीय पति बिमल बस्नेतले ०८१ भदौ २५ गते घाँटीमा खुर्पा प्रहार गरी हत्या गरेको आरोपमा इलाका प्रहरी कार्यालयले सोही दिन गिरफ्तार गरेको छ ।

घटना लगत्तै स्थानीयले प्रहरीलाई खबर गरेकाले गिरफ्तार गरेको इलाका प्रहरी कार्यालय निजगढका इन्स्पेक्टर सुमित कुशवाहाले बताउनु भयो । बुबाले खुर्पा प्रहार गरी आमाको हत्या गरेको आरोपमा मृतककी जेठी छोरी १७ वर्षीया गंगा राईले भदौ २६ गते इलाका प्रहरी कार्यालय निजगढमा उजुरी दिनु भयाे ।

भदौ २५ गते राति घरायसी विषयमा छलफल गरी आमा शौच गरीरहेको अवस्थामा बुबाले शौचालयमा गएर खुर्पा प्रहार गरेको छोरी गंगाले बताउनु भयाे । पीडितको घटना स्थलमा मृत्यु भएको इलाका प्रहरी कार्यालय निजगढका इन्स्पेक्टर सुमित कुशवाहाले बताउनु भयो ।

आरोपितले खुर्पा प्रहार गरेको देखेर आमालाई बचाउन गएकी दुई छोरीहरू जेठी छोरी गंगा राई र कान्छि छोरी १५ वर्षीया जमुना राई घाइते भएको इन्स्पेक्टर कुशवाहाले जानकारी दिनु भयो ।

साेही दिन घाइतेहरूको सामुदायीक प्रसुति गृह निजगढमा प्राथमिक उपचार गराई थप उपचार वीरगन्जको मेडिसिटी वयोधा अस्पतालमा भइरहेको उहाँले जानकारी दिनुहुँदै शव पोष्टमार्टमका लागि प्रादेशिक अस्पताल कलैयामा लगिएको बताउनु भयाे ।

आरोपित बस्नेतले मदिराको नशामा रहेको अवस्थामा खुर्पा प्रहार गरेको प्रारम्भिक अनुसन्धानले देखाएको प्रहरीले जनाएको छ ।

मृतक लक्ष्मीले आराेपित बस्नेतसँग २०७५ मा दोस्रो विवाह गरी सँगै बस्दै आएकी थिइन् । उनका दुई छोरीहरू पहिलाे पतिबाट जन्मेकी हुन् ।

भोलानाथ पौडेल