समाचारहरू

पतिको मृत्यु हुँदा पनि परिवारका सदस्यहरूले काजकिरिया गर्न नदिएको भन्दै पर्वतको फलेवास नगरपालिका–२ थापाठानाकी ४१ वर्षीया कृष्णकुमारी खत्रीले न्याय माग्दै जिल्ला प्रशासन कार्यालय, पर्वतमा उजुरी दिएकी छिन् ।

खत्रीले आफ्ना पति ५९ वर्षीय जीतबहादुर खत्रीको मृत्यु हुँदा किरिया बस्न परिवारका सदस्यहरूले नदिएको भन्दै माघ १० गते जिल्ला प्रशासन कार्यालय, पर्वतमा उजुरी दिएकी हुन् ।

कृष्णकुमारीका पति जीतबहादुर खत्रीको मृत्यु माघ २ गते घरमा नै भएको थियो । पीडित कृष्णकुमारीले पति बिरामी हुँदा समेत परिवारका सदस्यले भेट्न नदिएको र मरेपछि काजकिरिया गर्न नदिएको गुनासो गर्दै उजुरी गरेको प्रमुख जिल्ला अधिकारी गुरूदत्त ढकालले जानकारी दिए ।

कृष्णकुमारीबाट सन्तान नभएपछि जितबहादुरले अर्को विवाह गरेका थिए । पतिले अर्को विवाह गरेपछि उनी ०६६ सालदेखि सदरमुकाम कुश्मामा बस्दै आएकी थिइन् ।

सौतापट्टिका छोरा रामबहादुर खत्री, लेखबहादुर खत्री, अर्जुनबहादुर खत्री र बसन्तबहादुर खत्रीले किरियामा बस्न नदिने भनी दुर्व्यवहार गरेको भन्दै पीडितले उजुरी दिएको जिल्ला प्रशासन कार्यालय, पर्वतले जनाएको छ ।

प्रमुख जिल्ला अधिकारी ढकालले पीडितलाई न्याय दिनका लागि स्थानीय फलेवास नगरपालिका तथा सम्बन्धित वडाका प्रतिनिधिसँग समन्वय गरिरहेको जानकारी दिए ।

सन्तोष थापा