पठनपाठन चलिरहेको अवस्थामा विद्यालयको भवन भत्किदा विद्यार्थी घाइते

  ०७८ असोज १७ गते

विद्यालयमा पठनपाठन चलिरहेको अवस्थामा बारेकोट गाँउपालिका–२ लिम्सास्थित वीरेन्द्र प्राथमिक विद्यालयको भवन असोज १५ गते भत्कदा उक्त विद्यालयमा अध्ययनरत बालबालिका र सट्टा शिक्षक समेत नौ जना घाइते भएका छन् ।

बालविकास कक्षा संचालन हुँदै गरेको भवनको भित्ता असोज १५ गते दिउँसो पठनपाठन भइरहेको अवस्थामा एक्कासी भत्किएपछि भागदौडको क्रममा विद्यार्थी घाइते भएको शिक्षक कालीप्रसाद थापाले इन्सेक प्रतिनिधिलाई जानकारी दिनु भयो ।

कोठाको भित्ता भत्किएपछि बालकक्षामा अध्ययनरत ६ वर्षीय हिम्मत सिंह, ६ वर्षीया स्मृति शाही, ६ वर्षीय दिप्सन नेपाली, चार वर्षीया विजया शाही, सात वर्षीया अतिथि नेपाली, ६ वर्षीया अनिशा शाही, ६ वर्षीया डिप्रेना पुन र ११ वर्षीया लिप्सीना पुन रहेका छन् ।

उक्त भवन भत्कदा विद्यालयका सट्टा शिक्षक १७ वर्षीय समिर पुन पनि घाइते भएका छन् ।

उनीहरूको उपचार आधारभूत अस्पताल लिम्सामा भइरहेको शिक्षक थापाले जानकारी दिनु भयो । घाइते मध्ये पाँच जना सामान्य रहेको र चार जना गम्भीर रहेको जिल्ला प्रहरी कार्यालय, जाजरकोटका डीएसपी मधुकुमार थापाले बताउनु भयो । तत्काल अन्य विद्यार्थी, शिक्षक र प्रहरीले घाइते विद्यार्थीको उद्धार गरेर अस्पताल पु¥याएका थिए ।

विद्यालय भवन जिर्ण अवस्थामा रहेको र पानी परेको अवस्थामा छत चुहिने समस्या रहेको डिएस्पी थापाले जानकारी दिनु भयो ।

असोज १४ गते रातिदेखि अविरल परेको पानी असोज १५ गते बिहानसम्म परेको र असोज १५ गते दिउँसो घाम लागेपछि घामले विद्यालयको भवन तातिएपछि भत्किएको प्रहरीले अनुमान गरेको छ ।


दिनेश कुमार श्रेष्ठ