समाचारहरू

रुपनी गाउँपालिका–२ का १३ वर्षीय बालकलाई छिमेकी ५२ वर्षीय देवकृष्ण यादव, उनकी ४८ वर्षीया पत्नी फूलबरिया देवी र ३० वर्षीय छोरा महेशले कुटपिट गरेको भन्दै उनका परिवारले आरोप लगाएका छन् ।

परेवा धपाउन बालकले पटाका पड्काएको विषयमा मादक पदार्थ सेवन गरेर आरोपितहरुले बालकमाथि निर्घात कुटपिट गरेको बालकका बुबा प्रमोद भनिने कुन्दन साहले जानकारी दिनु भयो । पटाका पड्काएको विषयमा विवाद गरेर नियोजित रुपमा बालकलाई असोज ९ र १० गते गम्छाले हात खुट्टा बाँधेर लाठी र बुटले कुटपिट गरिएको उहाँले बताउनु भयो ।

कुटपिटबाट बालकको टाउको, छाती, पिठ्युलगायतका शरीरका विभिन्न भागमा निलडाम र चोट लागेको छ । आरोपितहरुले निर्घात कुटपिट गरेको र दाँत समेत हल्लिएको बालकले बताउनु भयो । इलाका प्रहरी कार्यालय रूपनीमा घटनाबारे जानकारी गराउँदा प्रहरीले वेवास्ता गरेको पीडित परिवारको आरोप छ ।

पीडितले जिल्ला प्रहरी कार्यालय सप्तरीमा समेत उजुरी दिनुभएको छ । जिल्ला प्रहरीबाट पनि कारबाही प्रक्रिया अघि नबढेको बालकका बुबा साहले गुनासो गर्नुभयो । रुपनी गाउँपालिका–२ का वडा अध्यक्ष सरोजकुमार यादवले घटनाबारे फोनमार्फत दुबै पक्षबाट जानकारी भएको तर वास्तविक कारण थाहा हुन नसकेको बताउनु भयो ।

मनोहरकुमार पोखरेल