समाचारहरू

खार्पुनाथ गाउँपालिका-५ का २८ वर्षीय गजेन्द्र रोकाय र सोही ठाउँका ३१ वर्षीय अमर ऐडीलाई जिल्ला प्रहरी कार्यालयका इन्स्पेक्टर विष्णुबहादुर सिंह र सोही कार्यालयका डिएसपी कमलप्रसाद नेपालले अमानवीय व्यवहार गरेको स्थानीयबासीले आरोप लगाएका छन् ।

खार्पुनाथ गाउँपालिका-५ का ७५ वर्षीय नरवीर बुढा र सोही गाउँका ४५ वर्षीय शेरबहादुर रोकाय असोज ८ गते माथिबाट आएको ढुङ्गा लागेर मृत्यु भएको भनिएको घटनाको सत्य तथ्य माग गर्दै असोज १२ गते जिल्ला प्रशासन कार्यालयमा धर्ना दिन पुगेका स्थानीयबासीलाई 'मदिराले लठिएका' इन्स्पेक्टर सिंहले अपशब्द बोल्दै नराम्रो व्यवहार गरेको मृतकका आफन्त गजेन्द्रले रोकायले गुनासो गरे ।

जिल्ला प्रहरी कार्यालयका डिएसपी कमलप्रसाद नेपालले 'यस घटनामा मुद्दा नलाग्ने बनाइदिन्छु' भन्दै धम्की दिएको अर्का स्थानीयबासी अमर ऐडीले बताए ।

जिल्ला सुरक्षा समितिका अध्यक्षसमेत रहेका प्रमुख जिल्ला अधिकारी लक्ष्मीप्रसाद बास्कोटाले प्रहरीले गरेको अमानवीय व्यवहारप्रति दुखित भएको भन्दै यस विषयमा आन्तरिक रूपमा कारबाही गर्ने र आमागी दिनमा यस्तो घटना हुन नदिने आश्वासन दिए ।

जिल्ला प्रहरी कार्यालयका डिएसपी कमलप्रसाद नेपालले किटानी उजुरी आएपछि मात्र अनुसन्धान गर्ने बताएको र आफूले मदिरा सेवन नगरेको स्पष्टीकरण दिए ।

नन्द सिंह