समाचारहरू

राष्ट्रपति विद्यादेवी भण्डारीले नागरिकको न्यायको अन्तिम अपेक्षा रहेको न्यायालयलाई राजनीतिक प्रभावबाट मुक्त बनाउनु पर्नेमा जोड दिएकी छन् । चैत ९ गते नेपालगन्जमा सुरू भएको नेपाल बार एशोसियसनको १४ औँ सम्मेलनको उद्घाटनका क्रममा भण्डारीले उक्त कुराका जोड दिएकी हुन् ।

उनले पछिल्लो समय सार्वजनिक घटनाक्रमले न्यायालयमा खराब संस्कृति मौलाउँदै आएको भन्दै न्यायालय नागरिकमूखी हुनुपर्नेमा जोड दिइन् । व्यक्तिगत लाभका लागि न्यायालयलाई प्रयोग गर्न नहुने भन्दै उनले न्यायपालिकामा उत्पन्न समस्यालाई सबै कानुन व्यवसायीहरूले एकजुट भएर समाधान गर्नुपर्नेमा उनको जोड छ ।

राष्ट्रपति भण्डारीले न्यायपालिकाभित्र आएका र आउनसक्ने विकृति न्यायपालिका स्वयम्ले सुधार्नु पर्ने बताइन् । उनले पछिल्लो समय न्यायपालिकामा गम्भीर प्रकृतिका घटना भएको बताउँदै यस विषयमा बार सम्मेलनको गम्भीर ध्यानाकर्षण हुनुपर्ने भनाइ राखिन् ।

सम्मेलनमा कायमुकायम प्रधानन्यायाधीश दिपकराज जोशीले स्वतन्त्र न्यायपालिका न्यायधीशका लागि नभई नागरिकका लागि रहेको बताए । उनले न्यायाधीशमा क्षमताका साथमा इमान्दारिताको खाँचो पनि औँल्याए ।

सम्मेलनमा प्रदेश ५ का मुख्यमन्त्री शङ्कर पोख्ररेलले संरचनाको अभावमा प्रदेश सरकार शुन्यबाट माथि उठेर काम गर्नुपरेको बताए । पोखरेलले यो वर्ष कानुन निर्माण वर्षरहेकाले कानुन व्यवसायीसँग सहयोगको अपेक्षा पनि राखेका थिए ।

विनोद पाण्डे