समाचारहरू

अदालत, मानव अधिकार र न्याय सम्पादन एकअर्काका परिपुरक हुन् ।

तर, जिल्ला अदातलमा दरबन्दी अनुसारका न्यायाधीश नहुँदा पेशी चढेका मुद्दाहरू स्थगित गरिएका छन् ।

जिल्ला अदालतमा ०७९ देखि न्याय सम्पादन गर्दै आउनु भएका न्यायाधीश टिकेन्द्र दाहाल ०८१ साउन १३ गते सरूवा भएर जानु भएपछि त्यसयता पेशी चढेका मुद्दा स्थगित भएका हुन् ।

न्यायाधीशको सरूवा भएपश्चात तत्काल अर्को न्यायाधीश नियुक्त नहुँदा पेशी चढेका मुद्दाहरू स्थगित गरिएको अदालतका तहसिलदार गोपाल खनालले बताउनु भयो । उहाँले भन्नुभयो “साउन महिनादेखि कुनै पनि मुद्दाको फैसला भएको छैन, नयाँ न्यायाधीश केही दिनमा आउनुहुन्छ, त्यसपछि न्याय सम्पादनको कार्य अघि बढ्नेछ ।”

जिल्ला अदालतमा आर्थिक वर्ष ०८०-८१ मा ८ सय ७६थान मुद्दा दर्ता भएका छन् । जसमध्ये ५ सय ४३ थान फछ्र्यौट भएका छन् । ३ सय ३३ थान मुद्दा फछ्र्यौट हुन बाँकी छ ।

दर्ता भएका मुद्दामा देवानीतर्फका ५ सय ८७ मध्ये ३ सय ९२ थान फछ्र्यौट भएका र १ सय ९५ थान फछ्र्यौट  हुन बाँकी छन् ।

जिल्ला अदालतमा सम्बन्ध विच्छेदको सबैभन्दा धेरै मुद्दा दर्ता भएका छन् । जम्मा दर्ता भएका ४ सय १० थान मुद्दामध्ये ३ सय १५ मुद्दा फैसला भएका छन् । ९५ थान मुद्दा फछ्र्यौट हुन बाँकी रहेको तहसिलदार गोपाल खनालले बताउनु भयो । सम्बन्ध विच्छेदका मुद्दामा अधिकांश २० वर्षदेखि २५ वर्ष र ४० देखि ५० वर्ष उमेर समूहको रहेको तहसिलदार खनालले बताउनु भयो ।

व्यक्तिवादी फौजदारीतर्फ ७९ मुद्दा दर्ता भएकामा २७ थान मुद्दा फछ्र्यौट भएका र ५२ मुद्दा फछ्र्यौट  हुन बाँकी छन् ।

सरकारी फौजदारीतर्फका १ सय ९९ थान मुद्दा दर्ता भएकामा १ सय १८ मुद्दा फैसला भइसकेका छन् । ८१ थान मुद्दा फछ्र्यौट हुन बाँकी रहेको अदातलको तथ्याङ्कले देखाएको छ ।

अदालतमा पुनरावेदनका १० थान मुद्दा रहेकामा ६ ओटा फछ्यौट भएका र चा। थान मुद्दा बाँकी छन् । अदालतमा निषेधाज्ञाको मुद्दा एक थान छ ।

अदालतको तथ्याङ्क अनुसार दुई वर्ष म्याद नाघेका पाँच ओटा मुद्दा फछ्र्यौट हुन बाँकी छ । जसमा जग्गा किचलोका चार र सम्बन्ध विच्छेदको एक थान मुद्दा छ ।

इवारा लिम्बू जबेगु