समाचारहरू

अपाङ्गता हुनुभएकी २६ वर्षीया महिलालाई बलात्कार गरेको आरोपमा सन्धिखर्क नगरपालिका-१२, झेडी कल्लाबोटका ६३ वर्षीय गोविन्दप्रसाद बस्याल विरुद्ध जिल्ला प्रहरी कार्यालयमा ०८१ जेठ ३२ गते उजुरी दर्ता भयो । पीडित महिलालाई आरोपितले बलात्कार गरेको भन्दै पीडित पक्षले जेठ ३२ गते जिल्ला प्रहरी कार्यालयमा उजुरी दिएको थियो । पीडित पक्षले दिएको सोही उजुरीको आधारमा फरार आरोपित विरुद्ध थप अनुसन्धान गरिरहेको जिल्ला प्रहरी कार्यालयका इन्स्पेक्टर दिपेन्द्र रावलले इन्सेकलाई जानकारी दिनुभयो । पीडितको स्वास्थ्य परीक्षण जेठ ३२ गते अर्घाखाँची अस्पताल, सन्धिखर्कमा भयो ।

पीडित महिला दिनहुँ बढ्दो समस्या भोग्दै अदालतको न्यायको प्रतिक्षामा बस्न बाध्ये हुनुभएको छ । आरोपितले अपाङ्गता महिलाको रुप माथि यस्तो अपराध गरेको छ, जो सुकै भए पनि उसलाई आवश्यक कडा कारवाही हुनुपर्ने छिमेकीहरूको माग छ । कमजोर महिला, छोरी चेली सुरक्षित रहन र विश्वास गर्न नसकिने भयो भन्दै स्थानीयहरूले गुनासो गरेका छन् ।

पीडित महिलाका ६२ वर्षीय बुबाले आफू काम गर्न र हिँड्डुल गर्न नसक्ने बताउनु भयो । 'आम्दानीको श्रोत छैन । खेतीपाती जोगाएर खान सकिन्न । पहिला विवाह गरेँ । बोल्न नसक्ने छोरीको जन्म भयो । पत्नीको पनि मृत्यु भयो । पछि कान्छी पत्नी ल्याएँ । तीन बहिनी छोरी जन्मे । पत्नीको दिमागले राम्रोसँग काम गर्न नसकेपछि समस्या हुँदै आयो । तीन ओटी छोरी साना छन् । स्कूल पढ्छन् । बोल्न काम गर्न नसक्ने ठूली छोरीको यस्तो अवस्था भयो', उहाँले भन्नुभयो ।

उहाँले गोविन्दप्रसाद पढालेखा शिक्षित, बुद्धिजीवी भन्ने सम्झिनुभएको थियो । तर आफ्नै छोरीलाई यस्तो बनाउँदा कुनै दया धर्म नआएको उहाँको भनाइ छ । 'अपराध नगरेको भए भाग्ने थिएन, अपराध गरेकै कारण भाग्यो । यो भन्दा ठूलो अपराध के हुन सक्छ हामीलाई मर्नु न बाँच्नु बनायो', उहाँले भन्नुभयो ।

पीडितको छिमेकीले गाउँमा पीडित सात/आठ महिना अघिदेखि बिहान उठेर आरोपितको घरमा जाने, सामान्य किसिमका काम गर्ने, खाने र साँझ राति घर आउने गरेको बताउनु भयो । तर आफूले त्यस्तो होला भनेर नसोचेको उहाँको भनाइ छ । पीडितको शरीरमा फरक अवस्था आएपछि बोल्न नसके पनि साङ्केतिक रूपमा सोध खोज गरेको उहाँले उल्लेख गर्नुभयो । भएको घटना इसरामा बताएपछि स्वास्थ्य चौकीमा लगिएको र गर्भ भए नभएको पुष्टी गर्न अर्घाखाँची अस्पताल, सन्धिखर्कमा लगेर जाँच गर्दा गर्भ भएको पुष्टी भएको उहाँको भनाइ छ ।

डाक्टरको जाँच रिर्पोट अनुसार साडे चार महिनाको गर्भ छ भनेपछि दाजुभाइ, छरछिमेक बसेर छलफल पश्चात तत्कालै प्रहरीमा उजुरी दर्ता गराएको उहाँले बताउनु भयो । प्रहरीमा उजुरी दिएको थाहा पाएपछि आरोपित फरार रहेको उहाँको भनाइ छ । उता कानुनी प्रक्रिया ढिला हुने भयो, यता पीडितको अवस्था दिन प्रतिदिन झन् कमजोर हुँदै गएको छ । खाना र स्याहार सुस्याहारको समस्या कसरी समाधान गर्ने भन्दै उहाँले चिन्ता व्यक्त गर्नु भएको छ ।

समाज सेवी पिताम्बर कुँवरले पीडितको स्वास्थ्य अवस्था नाजुक भएको बताउनु भयो । घरमा खानेकुराको समस्या, पीडित गर्भवतीलाई पौष्टिक आहाराको आवश्यकता भएको उहाँको भनाइ छ । पीडितको शरीरमा रगतको मात्रा कमी भएको डक्टरको भनाई छ । पीडित बोल्न र बुझ्न सक्ने भए केही सहज त हुने थियो । संरक्षक बुबा यता उता जान केही गर्न पनि सक्नु हुन्न ।

सन्धिखर्क नगरपालिका-१२ का वडा सदस्य खिमकला कुँवरले पीडित महिलाको न्यायको लागि मुद्दा अदालतमा गएको बताउनु भयो । पीडितको पीडा दिनदिनै बढ्दै गएको उहाँले उल्लेख गर्नुभयो । पीडित बोल्न, बुझ्न सक्नुहुन्न । रेखदेख गर्ने संरक्षकको नै समस्या छ । न्यायिक निकाय अदालत, प्रहरी प्रशासन लैजान ल्याउन झनै समस्या छ । पीडितको पालन पोषणका लागि सहयोगको आवश्यकता छ । अपराधिलाई कडा कारवाही हुनुपर्ने वडा सदस्य कुँवरको माग छ । पीडितलाई सामाजिक न्याय कसरी हुन्छ र दिन सकिन्छ भन्दै सहयोग पुर्‍याउने कुरामा आफूहरूले सबै निकायमा पहल गरेको उहाँको भनाइ छ ।

सन्धिखर्क नगरपालिका-१२ का वडाध्यक्ष नारायण खड्काले उक्त घटना आफ्नो वडामा भएकोले गम्भीर समस्या उत्पन्न भएको उल्लेख गर्नुभयो । 'आरोपितले अपराध गरेर भागेको छ, कडा निगरानीका साथ खोज अनुसन्धान गरेर कानुनको दायरामा ल्याउनु पर्छ । पीडितले न्याय पाउनु पर्छ, हामीले सहयोग पनि गर्नुपर्छ तर आरोपितको परिवारले पनि सहयोग गर्नुपर्छ । तब मात्र सामाजिक न्याय भएको मानिन्छ', उहाँले भन्नुभयो ।

कुलबहादुर नेपाली