न्यायका लागि पहल गरिदिन द्वन्द्वपीडितद्वारा इन्सेकसमक्ष आग्रह

  ०८० माघ २५ गते

तत्कालीन विद्रोही नेकपा माओवादीले आफ्नै घरको आगनमा बसिरहेका चौतारा सागाचोकगढी नगरपालिका-५ का शारदाप्रसाद ढुङ्गेलकी पत्नी ६० वर्षीया सुन्तली ढुङ्गेलले न्यायका लागि पहल गरिदिन ०८० माघ २४ गते इन्सेकसमक्ष आग्रह गर्नुभएको छ ।

तत्कालीन चौतारा गाउँपालिका-८, हाल चौतारा सागाचोकगढी नगरपालिका-५ का ५१ वर्षीय शारदाप्रसाद ढुङ्गेललाई ०६१ चैत १९ गते आफ्नै घरको आँगनमा बसेकै अवस्थामा दुई जना माओवादी कार्यकर्ता आएर गोली हानी हत्या गरेका थिए । मृतक ढुङ्गेललाई माओवादीले राजावादी भएको आरोपमा हत्या गरेका थिए । उहाँ राष्ट्रिय प्रजातन्त्र पार्टीका जिल्ला स्तरीय कार्यकर्ता हुनुहुन्थ्यो । ‘माओवादीले सञ्चालन गरेको द्वन्द्वको कुनै पनि सरोकार नराख्ने हामी सर्वसाधारण जनतालाई माओवादीले बिना कारण हत्या गरेका छन् । हत्यामा संलग्न व्यक्तिहरूलाई कानुनी कारबाही हुनुपर्छ’, सुन्तली ढुङ्गेलले इन्सेक प्रतिनिधिसँग बताउनु भयो ।

पतिको हत्यापछि आफूलाई संसारै खसेजस्तो अनुभूति भएको बताउँदै, आफ्नो लागि खुशीको दिन कहिल्यै नआउने र सधैभरी रोएरै हिँड्नु परेको द्वन्द्वपीडित सुन्तली ढुङ्गेलले उल्लेख गर्नुभयो । आफ्नो पीडा सुनाउँदै न्यायका लागि पहल गर्न अनुरोध गर्नेक्रममा नेपालको वर्तमान राज्य सत्ताले आफू जस्ता द्वन्द्वपीडित महिलाहरूलाई न्याय नदिने उहाँले बताउनु भयो ।

राप्रपाको जिल्ला कार्य समितिमा रहेर राजनीतिमा सक्रिय रहनुभएकी ढुङ्गेल गत स्थानीय निर्वाचनमा राप्रपाको तर्फबाट नगरपालिका प्रमुख पदको प्रत्यासी समेत हुनुहुन्थ्यो । आफूले न्यायका लागि ०७५ सालमा सत्य निरुपण आयोगमा र त्यसभन्दा अघि शान्ति समिति, जिल्ला प्रशासन कार्यालय, जिल्ला प्रहरी कार्यालय लगायत विभिन्न निकायमा उजुरी दिए पनि हालसम्म आफूले न्याय नपाएको सुन्तली ढुङ्गेलको भनाई छ ।

परिवारमा कमाइ गरेर पाल्ने पतिलाई माओवादीले गोली हानेर हत्या गरेपछि छोराछोरी र आफूलाई जीवनभर बाँच्न पुग्ने भरणपोषणको व्यवस्था सरकारले गर्नु पर्ने सुन्तली ढुङ्गेलको माग छ । त्यसैगरी आफ्नै घरमा बसेका पतिको बिना कारण गोली हानी हत्या गर्ने व्यक्तिहरूको कानुनी कारबाही गरी आफूलाई न्यायको लागि पहल गरिदिन इन्सेक समक्ष आग्रह गरेको उहाँले बताउनु भयो ।

Photo_080-10-25_Sindhupalchok


नातिबावु धिताल