समाचारहरू

बीरगञ्ज उमनपा-१६ राधेमाईका नौ वर्षीय छोरा राजन पटेलको शव बीरगञ्ज चिनी कारखानाको आवास क्षेत्रमा असोज २० गते फेला परेको छ । पीडित बालकको टाउको, नाक र आँखामा गम्भीर चोट लागेको, शरीरमा नीलडाम र मुखबाट फिज निस्केको हुनाले उनलाई कसैले मारेर फालेको हुनसक्ने पर्सा प्रहरीले जनाएको छ ।

पीडितको शव फेला परेको स्थान भन्दा ८० मिटर पूर्व उनले लगाउने गरेको चप्पल भेटिएको र उनले लगाएको हाफ पाइन्ट भने फेला नपरेको पीडित बालकका काका बृजकिशोर पटेलले बताए । शवको पोष्टमार्टम असोज २० गते नारायणी उपक्षेत्रीय अस्पतालमा गरेर अन्तिम संस्कारका लागि पुख्र्यौली घर रामनगरी गाविस लगिएको छ ।

असोज १९ गते साँझ ६ बजे घरबाट मेला हेर्न भनेर निस्केका राजन राति अबेरसम्म घरमा नआएपछि उनका काका बृजकिशोर पटेलले राति ११ बजे नजिकै रहेको वडा प्रहरी कार्यालयमा खबर गरेका थिए । आवास क्षेत्र नजिक शौच गर्न गएकाहरूले शव देखेपछि प्रहरीलाई खबर गरेका थिए । घटनाको अनुसन्धान सुरु गरिएको जिल्ला प्रहरी कार्यालय पर्साका प्रवक्ता डिएसपी चक्रराज जोशीले बताए । असोज २१ गते बिहानसम्म घटनाका बारेमा पीडित परिवारले उजुरी नगरेको प्रहरीले जनाएको छ ।

के.सी.लामिछाने