समाचारहरू

छिपला केदार मावि धङकङ सितोलामा मङ्सिर ३ गतेदेखि अनिश्चितकालीन तालाबन्दी भएपछि विद्यालयको पठनपाठन ठप्प भएको छ ।

विद्यालयमा नियमित पठनपाठन नभएको विरोधमा विद्यार्थीहरूले अनिश्चितकालीन तालाबन्दी गरेपनि विद्यालय खुलाउनतर्फपहल नहुँदा विद्यार्थीको पढाइ थप प्रभावित भएको हो ।

विद्यार्थीहरूले विद्यालयमा विषयगत शिक्षक हुनुपर्ने, पठनपाठन नियमित हुनुपर्ने, समयतालिका अनुसार विद्यालय सञ्चालन गर्नुपर्नेलगायतका माग राखेर विद्यालयमा तालाबन्दी गरेको विद्यालयका प्रधानाध्यापक मानसिंह महताले जानकारी दिए । पठनपाठनको विषयमा विद्यालय व्यवस्थापन समिति, अभिभावक, शिक्षक र विद्यार्थीहरू जिम्मेवार हुन नसक्दा झनै समस्या भएको महताले आरोप लगाए ।

उनका अनुसार कक्षा १० सम्म पढाइ हुने विद्यालयमा स्थायी शिक्षक एक जना मात्र रहेका छन् । प्रावि तहमा दरबन्दी भएका प्रधानाध्यापक महता विद्यालयका स्थायी शिक्षक हुन् । विद्यालयमा दुइ जना शिक्षक करार रहेका छन् । विद्यालयमा ६ जना शिक्षक नीजि स्रोतबाट भएपनि गत वर्षदेखि तलब खुवाउन नसक्दा नियमित पढाइ हुन नसकेको उनले बताए ।

'मावि तह पूरै निजी स्रोतमा भएको हुँदा शिक्षकलाई तलब भत्ता खुवाउन सकिएको छैन । विद्यालयमा पठनपाठन नहुँदा यहाँ अध्ययनरत २ सय विद्यार्थीको पढाइ प्रभावित भएको छ ।'-प्रधानाध्यापक महताले भने ।

शैक्षिक सत्र सुरू भएदेखि हालसम्म कक्षा ६ देखि कक्षा १० सम्मको विषयवस्तु पढाइ हुन नसकेको विद्यार्थी कमल महताले बताए ।

विद्यालयका प्रधानाध्यापक महताका अनुसार विद्यार्थीहरू समेत कक्षामा नआउने गरेको कारण पढाइ हुन नसकेको हो । 'पूर्ण पढाइ नभएको हैन ।'-उनले भने-'शिक्षकहरू पनि परीक्षा दिन जाने, विद्यार्थी अनुपस्थित हुने, अभिभावकले ध्यान नदिने गरेका कारण समस्या आएको हो ।'

नरेन्द्रसिंह कार्की