नौ जना पहिचान पक्षधर गिरफ्तार

  ०८० मङ्सिर २८ गते

नेपाल कम्युनिष्ट पार्टी(नेकपा) एमालेको ‘झुलाघाट-चिवाभञ्ज्याङ समृद्धिका लागि संकल्प यात्रा’ मा अवरोध पुर्‍याउन खोजेको आरोपमा प्रहरीले धनकुटामा नौ जनालाई मङ्सिर २७ गते गिरफ्तार गरेको छ ।

‘झुलाघाट-चिवाभञ्ज्याङ समृद्धिका लागि संकल्प यात्रा’को प्रतिरोध स्वरुप यातायात बन्द गराएको र शङ्कास्पद अवस्थामा रहेका १ नम्बर प्रदेश सङ्घर्ष समिति संखुवासभा, संयोजक वीरेन्द्र खारा राई, किरात राई यायोख्खा सङ्खुवासभा सचिव उमाकुमारी राई, १ नम्बर प्रदेश सङ्घर्ष समिति सङ्खुवासभा अध्यक्ष कर्वि राई, किराँत राई धनकुटा, अध्यक्ष उद्धवमणि राई, किराँत याक्थुङचुम्लुङ धनकुटा, अध्यक्ष कमलसिंह तिगेलालाई गिरफ्तार गरिएको प्रहरीले जनाएको छ ।

किराँत राई यायोख्खा पाख्रिबास नगर अध्यक्ष जितेन्द्र राई, किराँत राई यायोख्खा सङ्खुवासभा कोषाध्यक्ष सोकुल राई, नेपाल कुलुङकिराँत भाषा संस्कृति उत्थान सङ्घ सङ्खुवासभा सदस्य पण्डित कुलुङ र सङ्खुवासभाको मकालु यायोख्खा नगर सदस्य जुद्धवीर राईलाई लेगुवा बजारबाट गिरफ्तार गरिएको जिल्ला प्रहरी कार्यालयका डिएसपी राजबाबु महर्जनले बताउनु भयो ।

पहिचान पक्षधर समूहले ०८० मङ्सिर २६ गतेदेखि अनिश्चितकालीन यातायात बन्द आव्हान गरेका छन् ।

समृद्धिका लागि संकल्प यात्रा अन्तरगत एमालेको टोली मङ्सिर २८ गते लेगुवा बजारबाट धनकुटा प्रवेश गर्ने तयारी छ । त्यसकै विरोधमा १ नम्बर प्रदेश पुन नामाङ्कन संयुक्त सङ्घर्ष समितिले कोशी प्रदेशमा पर्ने मध्यपहाडी सडक क्षेत्र बन्दको आव्हान गरेको छ ।

पहिचान पक्षधर समूहले कोशी नामाकरणका पक्षमा हस्ताक्षर गर्ने ८२ जना सांसद र पहिचानविरूद्ध अभिव्यक्ति दिएको आरोपमा एमाले अध्यक्ष केपी ओली, नेता योगेश भट्टराई र महेश बस्नेत लक्षित विरोधका कार्यक्रम गरिरहेको छ ।

प्रहरीले सम्भावित अवरोध र त्यसबाट उत्पन्न हुन सक्ने सुरक्षा चुनौतीलाई मध्यनजर गर्दै पूर्वी पहाडको सुरक्षा व्यवस्था कडा बनाएको छ ।

पहाडी क्षेत्रमा सुरक्षा व्यवस्था मजबुत बनाउन तराईका जिल्लाबाट समेत सुरक्षाकर्मीहरू मध्यपडाही राजमार्गमा परिचालन गरिएको छ ।


ईश्वर थापा