समाचारहरू

अनौपचारिक क्षेत्र सेवा केन्द्र (इन्सेक)ले वार्षिक रूपमा प्रकाशन गर्दै आइरहेको नेपाल मानव अधिकार वर्ष पुस्तकको नयाँ सृङ्खला नेपाल मानव अधिकार वर्ष पुस्तक-२०१७ का लागि प्राप्त घटनाहरूका सन्दर्भमा छलफल गरी अन्तिम रूप दिन पाँचै क्षेत्रमा क्षेत्रीयस्तरको सम्पादन भेला पुस २४ गतेबाट सुरू भएको छ ।

पूर्वाञ्चलको विराटनगरमा, मध्यमाञ्चलको धुलिखेलमा, पश्चिमाञ्चलको पोखरामा, मध्यपश्चिमाञ्चलको नेपालगञ्जमा र सुदूरपश्चिमाञ्चलको धनगढीमा पुस २४ र २५ गते सम्पादन भेलाको आयोजना गरिएको हो ।

भेलामा सहभागी पश्चिमाञ्चलका जिल्ला प्रतिनिधिहरूले जिल्लागत रूपमा मानव अधिकारको अवस्थाका बारेमा जानकारी गराइरहेका छन् । नेपाल मानव अधिकार वर्ष पुस्तक-२०१७ प्रकाशनको पूर्व सन्ध्यामा जिल्लागत प्रतिवेदनलाई अन्तिम रूप दिन भेलाको आयोजना गरिएको इन्सेकका क्षेत्रीय कार्यालयका संयोजकहरूले बताएका छन् ।

दुईदिने भेलामा जिल्ला प्रतिनिधिहरूले जिल्लामा घटना सङ्कलन गर्दा छुटेका सूचनाको बारेमा छलफल गरिने र वर्ष पुस्तकमा समावेश गरिने घटनाहरूको पनि सम्पादन गरिने मानव अधिकार प्रलेख तथा प्रसार कार्यक्रमका व्यवस्थापक मदन पौडेलले जानकारी दिए ।

उनले इन्सेकको कामलाई अझ विश्वासिलो बनाउन जिल्ला प्रतिनिधिहरूले घटना सङ्कलनको काममा चनाखो भइ पीडितलाई न्याय दिने कार्यमासमेत अझ सक्रिय हुनुपर्नेमा जोड दिए ।

अनलाइन डेस्क