समाचारहरू

नेत्रविक्रम चन्द 'विप्लव' नेतृत्वको नेपाल कम्युनिष्ट पार्टी आबद्ध १० जना कलाकारलाई प्रहरीले जेठ २३ गते गिरफ्तार गरेको छ ।

सुकीदह गाउँपालिकाको पाछाबाङमा सांस्कृतिक कार्यक्रम गरी दुईखोली गाउँपालिकाको इरिबाङ पुगेका कलाकारलाई प्रहरीले चुनाव विरोधी गतिविधि गरेको आरोपमा गिरफ्तार गरेको हो ।

गिरफ्तार पर्नेहरूमा पाँच जना बालबालिका रहेका छन् । उक्त पार्टीको जनसांस्कृतिक टोलीका सदस्यहरू दुईखोली गाउँपालिका-३ इरिबाङका २३ वर्षीय रोशन डाँगी, १८ वर्षीय तारा परियार, सुनछहरी गाउँपालिका-५ जैमाकसलाका २० वर्षीय कृष्ण पुन, २० वर्षीय समिर पुन, १८ वर्षीया  ज्योती पुनमगर, रोल्पा नगरपालिका-२ लिबाङका १६ वर्षीय वीरेन्द्र पुन, भूम्या गाउँपालिका-९ चुनबाङ रूकुमकी १६ वर्षीया श्रृष्टिना पुन, लुङ्ग्री गाउँपालिका-१ पाङकी १७ वर्षीया मञ्जु घर्ती, त्रिवेणी गाउँपालिका-६ जुँगारकी १६ वर्षीया प्रभा खड्का र विना पुनलाई प्रहरीले गिरफ्तार गरेको जनाएको छ ।

उनीहरूलाई सार्वजनिक अपराधको मुद्दा चलाइएको प्रमुख जिल्ला अधिकारी डा. डिजन भट्टराईले जानकारी दिए ।

नेकपाका जिल्ला सेक्रेटरी दलबहादुर खत्री 'जागृती'ले स्वतन्त्र रूपमा सांस्कृतिक कार्यक्रम गर्दै हिँडेका आठ जना कलाकार र कलाकारहरू बसेका घरका दुई जनालाई समेत प्रहरीले गिरफ्तार गरेको बताए ।

माधवकुमार ओली