समाचारहरू

मङ्सिर ४ गते राति सहकारी तथा गरिबी निवारण राज्यमन्त्री तथा बाग्लुङ क्षेत्र नं १ को काङ्ग्रेस उम्मेदवार चम्पादेवी खड्काको घरमा भएको बम विष्फोटमा संलग्न भएको आरोपमा प्रहरीले नेपाल कम्युनिष्ट पार्टीका जिल्ला सहइञ्चार्ज नन्दराम थापाई मङ्सिर ८ गते गिरफ्तार गरेको छ ।

थापालाई प्रहरीले काँठेखोला गाउँपालिका-४ स्थित उनकै निवासबाट गिरफ्तार गरेको जिल्ला प्रहरी कार्यालय बाग्लुङका डिएसपी विश्वराज सिंह थापाले बताए ।

घटनामा संलग्नहरूको खोजी गर्ने क्रममा थापालाई नियन्त्रणमा लिएर अनुसन्धान थालिएको थापाले बताए ।

गृह मन्त्रालयले निर्वाचनका गतिविधिलाई प्रभावित गर्ने काम गर्ने जोसुकैलाई गिरफ्तार गर्न निर्देशन दिएको जिल्ला प्रशासन कार्यालयले जनाएको छ ।

'माथिबाट गिरफ्तार गरी कारबाही चलाउनु भन्ने निर्देशन आएको छ ।'-प्रमुख जिल्ला अधिकारी बिष्णुबहादुर थापाले भने-'सुरक्षा व्यवस्थालाई थप कडा बनाइएको छ ।' उनले विगतका निर्वाचनमा अवरोध गर्नेहरूको समेत खोजी भइरहेको बताए ।

सृजना पन्त