समाचारहरू

नेपाल कम्युनिष्ट पार्टी सल्यानले मतदाता शिक्षा सामग्री जलाएको आरोप छ । सो पार्टीका कार्यकर्ताले कात्तिक ३० गते राति १० बजे जिल्लाको बागचौर नगरपालिका-१ मा जिल्ला निर्वाचन कार्यालयबाट खटिएका एक मतदाता स्वयम्सेवकको घरबाट मतदाता शिक्षा सामग्री नियन्त्रणमा लिएर जलाएका हुन् ।

बागचौर नगरपालिका-१ कोटबेतका स्वयम्सेवक तोला बस्नेतको घरमा राति करिव १० बजेको समयमा तीन जनाको अपरिचित समूहले मतदाता शिक्षा सामग्री नियन्त्रणमा लिएर जलाएको बस्नेतले जानकारी दिए ।

प्रमुख जिल्ला अधिकारी परमानन्द घिमेरेले कानुनलाई हातमा लिएर अवाञ्छित कार्य गर्नेहरूको खोजी कार्य भइरहेको जानकारी दिए । उनले कानुनको धज्जी उडाएर कानुन विपरीत काम गर्ने जो कोहीलाई पनि नछोड्ने बताए ।

यसैबिच नेकपाका कार्यकर्ताहरूले कात्तिक २३ गते दिउँसो पनि मतदाता शिक्षा सामग्री र उम्मेदवारका प्रचार सामग्री नियन्त्रणमा लिएर जलाएका थिए ।

बागचौर नगरपालिका-३ खालीमा माओवादी र एमालेका कार्यकर्ताका हातबाट आफ्नो कार्यकर्ताले पर्चा पम्पलेट खोसेर जलाएको जिम्मा नेकपाका जिल्ला इञ्चार्ज डिल्लीराज शर्माले लिएका छन् ।

मीना बुढाथोकी